Ka sorkar jylla da pynkhreh ko wow pynku yei yarap poisa cha ki manyung yong ki 5 ngut kiwa da khlaad noh hei chah siat ha ki pulit Assam hei step yong ka 22 tarik u Khonchonglad ha Mukroh.
U Symbood Montri Rangbah ka jylla, u Prestone Tynsong da khana u wa ka sorkar da phah ko ya ka chnat Revenue wow pynkylla noh ya ki kattu katni ki kyndon kiwa em ha ka aiñ wow e yarap poisa cha kiwa ha-yung ki 5 tylli ki manyung ha Mukroh, wei da pyntip u leh wa ka chnat Revenue da sdang ko katni wow leh ya kiwa emkaam.
Hawa yatoh wa i dawa wow thung kreh ya kiwa ha-yung ki 5 ngut ki waheh wa da khlaad, u Prestone da khana u wa ka sorkar dang bichaar bniah, tangwa ya iwa katni dang pyrkhat kammon u kyntu ya ka yarap poisa cha kitai ki manyung.
Ha iwi won i liang, u Symbood Montri Rangbah, u Prestone Tynsong da khana u wa neibynta ki 2 ngut kiwi kiwa mynsoo, ka sorkar da bichaar ko leh wa kammon wow yarap poisa wa chisien e. Da pyntip u wa neiliang ka sorkar da bahkhlieh ko yei lut i sep hawa yatoh wa i sumaar ya kini ki ar ngut.
Kam wow kdaw wa hadien i jia chah siat ha Mukroh ha ka 22 tarik u bnai wa da dep heiwa da chim yei mynsien yong ki 5 ngut, da mynsoo leh arngut, wei neiliang ka sorkar da pynbna ko wow e mar T. 5 lak cha ki manyung kiwa da khlaad wei wow su leh ka bai sumaar yong kiwa da mynsoo.
