December 11, 2022
Ka 11 tarik uni u bnai, da man ko ka sngi wow sahkynmoo ya ki khon ka Seiñ Raij Chnong Cham Cham, Raij Tuber heiwa u Montri ka chnat Bhalang namo ka Social Welfare uwa man leh u MLA ka thaaiñ da wan wai u ya ka Khnap Thang-bru (Kambel Chullai Eco Friendly Crematorium) chirup wa u MDC ka Tuber, u Lasky Rymbai kam u symbood kongsan hei emlang u MDC ka Rymbai Khliehriat, u Fineliness Bareh, u Dolloi ka Elaka Jowai, u Puramon Kynjing wa kiwi kiwi.
Kani ka khnap thang-bru da chna ha Loom Thang-bru ka chnong heiwa yaka yalang wai da pynlai da u Pelin Dkhar uwa man u Chairman ka Seiñ Raij wei da yoh ya ki kyntien Ngooh Blai na u Nit Dkhar uwa man u waheh ka Seiñraij.
U S. Phawa uwa man u Secretary ka Seiñ Raij, da khana u wa ha u 2015 da yohbor na ka Seiñraij Jowai wow chna ya kani ka Khnap Thang-bru wei da thooh laad na ki chnat Khloo wow paan yarap na ka sorkar wei da lai noh cha Shillong heiwa u da phah ki wow yachem ya kiwa mihkhmat.
Ha u Wisu (Mar) 2021, ka chnat da pynheh ko ya i dor chna (Estimate) heiwa da yachem wa ki tangwa ym em man kaam hiwot wei ha u Naikhynde 2021 da lai yachem ya u MLA ka thaaiñ u Kyrmen Shylla ha Shillong heiwa da khana u wa da leh u yeiwa emkaam neiliang yong oo wei ki kot ki sla da lai ki chaphrang ha ka chnat sorkar.
Wei hadien kattu katni por da yoh ya ka Work Order na u MLA wa ka sorkar ha i lut wa T. 33 lak tam wei da pyndep yei kreh du hapoh 6 bnai donhi kamjooh leh ya da e khublei u ya ki waheh ka Seiñraij wa ya u Kyrmen Shylla hajrong ini.
Da pyntip leh wa u Kyrmen Shylla da e yarap u T. 2 lak wow chna ya ki mootylleiñ mootymmoh hapoh ka chnong.
U Puramon Kynjing hawa e yei klam da ong u wa i yoh ya kani ka Khnap Thang-bru man ko i burom wa khroo wei i em kani ka yung daw pynsuk ko ya ki paidbah khamtam heipor wa em u slap.
Da ong u wa i wanrah ya kani ka thaw da wanrah ko yei suk ya ki bru kamjooh wow yada ya ka Rymaw.
U Kyrmen Shylla hawa e yei klam da kynmoo u yei por wa wan ki waheh cha oo wow paan yarap wow chna ya kani ka Khnap Thang-bru heiwa oo leh da sñiawkhia u yeini i kaam.
Da ong u wa da sñiaw yei yaroh na kiwa klam ynne, tangwa da ong u wa ini toh i kaamram yong phi ki bru kamjooh i kaamram yong oo wow e yeiwa emkaam ki paidbah.
Chooh chooh da ong u wa kani ka Scheme wow chna ya kani ka khnap toh lyngba ka CMSDF wei neiliang u Montri Rangbah leh da pdiang u yeini wei da yoh ya kani ka Scheme.
Da ong u leh wa manda poi i por wow pynlait u chna ya u sarok na Shkenpyrsit cha Sanchnong heitæ i por daw man uwa hun mynsien, wei da khoh u leh ya ki kattu katni ki kaam pynroi wa kwah u wow wanrah ha ka thaaiñ ya kawa kynthup leh ka CHC.
Da ong u wa emkaam wow burom kylliang ya iwi na iwi wei ngait skem u wa i em kani ka Khnap daw pynsuk ko ya ki manyung khamtam ha i lut ki dieñ wa i por.
U Kyrmen da sñiawkmen u wa em ki khon ka Niamtre hadooh katni wa pynneh pynsah ki ya ki riam ki bait wa ki moopynyieñ.
Da yoh leh i klam na u waheh chnong, u C. Dkhar, u President ka Seiñraij Tuber, u H Phawa, u K. Sympli, u MDC ka Khliehriat u Fineliness Bareh, u MDC ka Tuber u L. Rymbai wa kiwi kiwi.
Da pynphooh ya kani ka sngi da ki rwai ki khon ka Seiñ Raij Chnong Cham Cham.
