U Symbood Montri Rangbah ka jylla, u Prestone Tynsong da beiñ u ya u heh ka Liang Pyrchah, u Dr. Mukul Sangma hajrong i pynkrehkaam ya ka Inner Line Permit (ILP), heiwa da ong u wa heipor wa u Dr. Mukul dang man u kam u Montri Rangbah da ki spah sien da pynksan u wa ym emkaam ya ka ILP hapoh ka Dhab ki Montri namo ka Cabinet.
U heh ka Trinamool Congress Legislature Party hapoh ka jylla, u Dr. Mukul Sangma da pynbaad u wa ki seiñ saiñhima kiwa em ha ka sorkar Meghalaya Democratic Alliance (MDA) da chet kylla ki ya ki paidbah heiyatoh wa i pynkrehkaam ya ka ILP.
Hajrong ini, u Prestone da pynsñiaw u yei phylla neibhah heipor wa man Montri Rangbah u Mukul toh uwa da pyn-eh wow dam u pynkrehkaam ya ka ILP, wei katni hawa em u ha ka Liang Pyrchah da kylla sur noh u. Da ong u wa emkaam wow kylli ya u Dr. Mukul iyi i daw wa pyn-eh u triang ya ka ILP, katwa katni won emkaam ya ka ILP.
Hawa kylli, u Prestone da ong u wa ha kitu ki por emlang u ha ka sorkar ymye wow leh iwon iwon neibhah i synchaar embor u Dr. Mukul u wym ap yeiyi yeiyi leh iwa da pynman ya ki wow mih noh na ka Congress.
U Symbood Montri Rangbah da kylli u leh ya u Dr. Mukul, weileh ha kitu por da ong u wa ym emkaam ILP hawa nadooh kitu ki por da joor bha i yakhih da ki seiñbhalang wei katni uni u jooh u bru ong u wa emkaam ya ka ILP.
