Palat 1500 ngut ki khynnah na ki 62 tylli ki thaw puræ da yalang ki ha Shillong International Centre for Performing Arts & Culture (SICPAC) neibynta ka Aspire Meghalaya State Summit 2022 kawa da pynman haka 14 tarik uni u bnai heiwa da emlang u Montri Rangbah ka jylla, u Conrad K Sangma.
Kani ka Aspire Meghalaya man ko leh kam chibynta wow chem ya kitu ki khynnah wa em yei sap heiwa da dep jied ya 36 ngut kiwa da em jar jiar ki sap ha i rwai, i chaad, i tem i put, i chna tiar wa kiwi kiwi de heiwa da yoh ki leh wow pynyoo yei sap yong ki ha kani ka sngi heiwa da wan wow sakhi da kiwa boon wei da em leh kiwa bichaar yei sap yong ki.
Kini kiwa da chah jied toh kiwa da yoh leh yei e sikai Soft Skills wa Talent Identification Programme hapoh ka Aspire Meghalaya wei da chah jied ki na ki 13,000 ngut ki khynroo khyllood heiwa da jied nyngkong ya 348 ngut na ki 62 tylli ki thaw puræ wa da pynman ha jar jiar ki District ha u Naichiphaw wa u Khonchonglad uni u snem.
Ynnin da jied ya ki Top 3 Aspire State Stars deiwa klem kheiñ kiwon kiwa yoh nyngkong, wa ar, wa le tangwa ki 3 ngut kiwa tam dooh i sap kiwa man kamni: U First Colour Lathong (Musical Instruments) uwa 19 snem uwa puræ Class 12 ha St. Dominic Higher Secondary School, Mowkyndeng, West Jaiñtia Hills District; ka Rida L Nonglait (Singing) kawa 15 snem kawa puræ Class 9 ha Kynshi Higher Secondary School, Kynshi, Eastern West Khasi Hills District waka Phibalari Thongni (Dance), kawa 14 snem wa puræ Class 9 ha St. Mary’s Higher Secondary School, Rangblang, South West Khasi Hills District.
Da jied leh ya ki Top 10 kiwa kynthup ya u Fiuberth Ch Momin (Art & Craft), uwa 21 snem wa puræ Class 11 ha Captain Williamson Memorial Government College, South Garo Hills District; u Fastrossing Kharsyntiew, uwa 21 snem wa u Pynshaibor Wahlang (Sustainable Innovation) uwa 19 snem wa puræ Class 12 wei kini toh kiwa puræ ha Sibsingh Memorial Government Higher Secondary School, West Khasi Hills District; u Excellency Turnia (Musical Instrument) uwa 20 snem wa puræ ha 1st Sem, Sngap Syiem College, South West Khasi Hills; u Jiovanni Nongrum (Singing) uwa 22 snem wa puræ 5th Semester ha Nongstoin College, West Khasi Hills District; u Gavy Jones Lyngdoh Marshillong (Dance) uwa 21 snem wa puræ 5th Semester ha Nongstoin College, West Khasi Hills District; ka Wadamika Phalangki (Singing) kawa 18 snem wa puræ Class 12 ha Government Girls’ Higher Secondary School, Jowai, West Jaiñtia Hills District; ka Annyzza Gratel Lyngdoh (Singing) kawa 20 snem wa puræ 3rd Semester ha Ri Bhoi College, Ri Bhoi District waka Anastacia Sun (Singing) kawa 17 snem wa puræ Class 11 ha Kynshi Higher Secondary School, Eastern West Khasi Hills District.
Ki 36 ngut kiwa da poi ha Shillong nadooh ka 9 tarik wow chimbynta ha kani ka State Summit deilang wa ki bei ki pa ki, da yoh ki leh yei chah sikai yow pynkhreh u chimbynta ha kani ka State Summit heiwa da yahluti ya ki da u Kitkupar Shangpliang waka Pynsuklin Syiemiong kiwa man ki dkhot ka dhab tem wa tip kam ka Summersalt deiwa emlang leh u Benedict Skhemlang Hynniewta, u Tengnang D Sangma, u Lamphang Syiemlieh, ka Anniesha Mawrie, u Shepherd Najiar, ka Gracyl Ropmay, ka Rida Gatphoh, u Naga Karthik MP, u Banshai Mukhim wa u Shaun Morehead Nonghulo.
Kiwa bichaar namo ki dkhot ka Talent Selection Jury kynthup ki ya u Mikhail Marak, ka Simi Khongtiang, u Benedict Skhemlang Hynniewta, ka Monica Chanda, u Dr. N. Munish Singh, ka Careen Joplin Langstieh waka Meba Ofilia.
U Montri Rangbah ka jylla, u Conrad K Sangma hawa e yei klam da ong u wa waroh toh kiwa kyrpang tangwa boon ki khynroo khyllood yong i da im ki khlem da tip yei sap yong ki hanla da tip ki yeiwa ka-it wow leh wei ym em da yoh ki wow pynemkaam yei sap wa da e u Blai ya ki. Kamtæ da ong u wa kani ka Aspire Meghalaya toh ka luti wa khian yow yah ya ki khon khynroo khyllood ka jylla cha ka luti wa toh u lai ki kamjooh wow wailad wei wow e ya ka rynsan ya ki yow pynku ya ka ri yong i.
Ha kani ka sngi da pynlait leh yei rwai Aspire Meghalaya Anthem wa da rwai da ki Aspire District Stars deilang wa ki dkhot ka Summersalt heiwa yeini i sur da chna da u Kit Shangpliang, ka Pynsuklin Syiemiong, u Gregory Ford Nongrum, u Daryl Diengdoh, u Augustine Kurbah waka Aroha Choir.
Kani ka Aspire Meghalaya toh kawa da sdang ha u Wisu (Mar) 2022 yow e sikai ya ki khynnah yeiwa emkaam ki yow heh u san ki, yow tip ki wow jied ya ka luti lai puræ kamjooh yow chem ya kiwa em sap ha waroh ki District.
Ya ini da leh hapoh ka Directorate of Sports & Youth Affairs ka sorkar Meghalaya wei da kyrchaan da ka State Education Mission Authority Meghalaya (SEMAM SSA) wei da pynkrehkaam da ka AVENUES.
Puræ leh: Chah jied ki khynnah ka St. Dominic wa Govt. Girls’ kam ki District Star ka West Jaiñtia Hills
