December 14, 2022
I dawa Khasi Jaiñtia State yong ka Hill State People’s Democratic Party (HSPDP) ynne ka sngi da poi i cha nongbah Delhi, heiwa kani ka seiñ wa da rim ka jylla da lai chong kyllaiñ myngngor ki ha Jantar Mantar wow pynsñiaw yeini i dawa.
Ini i yakhih toh neibynta wa ar sngi, heiwa da yahkhmat da u President ka seiñ, u KP Pangniang wa kamwa 30 ngut ki dkhot ka Party.
Ha kani ka sngi da kbai ya i kyntien “I dawa Khasi Jaiñtia State, khlem Khasi Jaiñtia State ym chongngiah” wei ya ini i yakhih da pynman hapoh ka lama ka National Federation for New State (NFNS).
Hapoh kani ka NFNS kiwa embynta lang kynthup ki ya kiwa dawa ya ki jylla kam ka Gorkhaland, Tipraland, Bodoland, Garoland, Bundelkhand, Vidharbha, Khasi wa Jaiñtia, Karbi Anglong, Dima Hasao Autonomous State wa ka Kuki State.
Kini waroh kiwa emlang ha kani ka satri da pynman ki ya i yakhih wa ar sngi ha sorbah New Delhi wow dawa jylla jar jiar wei katni u President ka HSPDP u Pangniang da thoh u cha u President ka NFNS wa kam ka Party u emlang ko ha kani ka seiñ.
