U Montri ka chnat Bordiñ, u Abu Taher Mondal hawa e yei jubab hapoh ka yung dorbar chna aiñ ynnin ka sngi da pyntip u wa ka sorkar da dep ko wow pynmih hukum wow chah ya ki kari wa khia 20 MT donhi deiwa kheiñlang wa ki mar wa kit wa ye u lai na ka yingkieñ Umiam Dam.
Kani ka yingkieñ toh kawa da wai nadooh u snem 1965 wei ka sorkar da dep phah ko wow chim yukheiñ yei chkeh kani ka yingkieñ yeiwa da leh da ka Center Water & Power Research Station, Pune kawa em hapoh ka Jal Shakti Ministry wei hadien ini da wan leh wow thooh bniah da ka IIT wei da chem ki wa i rukom kyrbeh ko toh dang em hi hapoh u pood wa biang tangwa da phah ki wow chna pynchkeh ya kani ka yingkieñ yow ye ko wow chah yei boon ki kari wa lai na ka wei yeini da dep wow leh.
U Montri da pyntip u leh wa yow lait u oor kani ka yingkieñ, da pynkhreh yow chna da kawi won ka sarok wei katkam ki kyndon ka sorkar pyrdi uni u sarok toh wow chna da u 4-Lane.
Heiyatoh wow pyntikna wa ki kari wa la na kani ka yingkieñ ym kit ki palat pood, u Montri da pyntip u wa ka chnat Transport wa pait yeini wei ki DC ka Ri-Bhoi wa East Khasi Hills da phah ki ya ki pulit wow pait yeini.
Da pyntip u leh wa i por yong kani ka yingkieñ toh iwa da kut wei ka sorkar da pynchna pynkhlan ko ya ka yow ye u pynim slem ka wei yeini i kreh da e cha ka Ms Sanrachana Structural Strengthening Pvt Ltd, Thane Mumbai.
Chooh chooh da pyntip u wa hadooh ka High Court leh da pynmih hukum wow khang ya kiwon kiwon ki jiat kreh hajan kani ka yingkieñ nadooh i tih moo tih chyiap.
