U Montri ka chnat Food Civil Supplies & Consumers Affairs, u Comingone Ymbon hawa e yei jubab hapoh ka yung dorbar ynnin ka sngi da pyntip u wa da em 45,280 ngut kiwa dang yaleh thymme yow yoh Card Ration.
Da pyntip u leh wa ka sorkar pyrdi da phah ko wa u pynmih ya ki thaw saam khoo rachon da kiwa thymme u leh du hadien wa da pyndep wow leh ya ka Census tangwa neidaw wa em ka khlam COVID-19, ka Socio-Economic Census ym ye wow pyndep ka katkam i por.
Heiyatoh wa i pynyabi ya u Aadhaar Card waka Card Ration, da pyntip u wa kiwa da em Aadhaar da em ki 56.90% wei kiwa em Ration Card kiwa em Aadhaar da em ki 26.60%.
U Montri Rangbah ka jylla, u Conrad Sangma hawa slem u Comingone wow jubab yeiwa da kylli wa kiyi wa emhok wa ki kyndon yow ye u yoh Card Ration, da pyntip u wa hapoh ka NFSA da pait ya iwon i thaw wa em wa sah ki bru wei lada toh cha ki thaw wa em cha palatsor, ki kyndon phær ki ya kitu kiwa em cha sor.
Wei ya kini ki kyndon da booh hakhmat ka yung dorbar yow ya tiplang da waroh.