Katkam ka kyrwoh wa da pynlait da ka KSU, da pynsñiaw yei sñiawkhia ya iwa da jia ha ka 2 tarik uni u bnai heiwa ka seiñ da kam ko wa em i chah thombor ki paaid Khasi kiwa sah ha ka chnong Khedagor, Manipur wei ka seiñ ka ong ko wa da yoh ko leh ya ki Video wa da em wa riñ ha katai ka thaw wa jia i kynaad wa da pynyoo wa ki jaitbru Meitei da pyrchang ki wow tba kti ya ki bru Naga, heiwa da em leh i yamai i ya kajia wa joor bha hapyrdi kitai ki arliang.
Katkam wa ong u waheh chnong ka chnong Khasi ha Khedagor, Temenglong kawa em ha jylla Manipur, wa toh ki Bengali kiwa ktah ya ki Manipur.
Chooh chooh da khana leh wa ki Meitei wa ki Bengali da pynwit pynthut ki barabor ya ki thaw rep yong ki paaid Khasi ha katai ka chnong wei hadooh katni ki Khasi dang im ki dei sier mynsien. Heiwa da em leh i pynbor wa hap ki wow yut noh chisyndon cha Meghalaya.
Ka KSU da ong ko wa i thombor ya ki Khasi wa chong chnong ha Manipur dang jia i neipor cheipor wot hadein wa da pyntikna u Biren Singh, Montri Rangbah ka Manipur hakhmat ka KSU Shillong ha u snem 2022 wa ki Khasi kiwa da chong chnong ha katai ka thaw daw yoh ki yei yada na ka sorkar wei ya kiwi kiwa sah pyrchah aiñ daw chah kyndang lut ki chisyndon, tangwa i man ha katai ka thaw da nang rap sih chooh chooh i bar ya nachwa.
Kamtæ ka KSU da booh ko yei kyrpaad ya ki payu para kiwa man kam ki Meitei wow pyntikna lang wa ki Khasi kiwa em ha ka jylla Manipur toh u im ki dei suk dei saaiñ, khnang wa i yatoh wa i yajan bha hapyrdi ki Khasi wa ki Meitei u neh skem i chirta.
Hadooh kini ki sngi, da em ki Signboard wa da booh ya ki kyndon maham da ka Forest Department yong ka Manipur wa khanglaad wei maham joor ya ki Khasi wa man tre thaw wow lai rep ki ha katai ka thaw tangwa ki Bengali wa ki Meitei dang chim kabu ki wow kamtre ya katai ka thaw yong ki paadi Khasi, da ong u Donald V Thabah, General Secretary ka KSU.
Puræ leh: Kular u MR ka Manipur wow yada ya ki Khasi wa em ha Tamelong wa Jiribam District
