Ka Voice of the People Party (VPP) ym pu yoh ko yei jubab na ka sorkar wei kamjooh na ka yung krehkaam u Lamphang ka yung dorbar hajrong i dawa wow khut pynman ya ka dorbar wa kyrpang neibynta wow yatai hajrong i pynkrehkaam ya ka Roster System wei kamjooh wow pait biang ya ka aiñ bhah kaam lane ka Reservation Policy.
Hawa yaklam wa uwa e ktien ka VPP, u Dr. Batskhem Myrboh da ong u wa ka Party da dawa ko na u Montri Rangbah wa na u Lamphang ka yung dorbar wow khut ya ka dorbar kyrpang, tangwa hadooh katni ym pu yoh ya ka jubab dei thoh, tangwa da yoo donhi ha ki laad pathai khubor wa u Symbood Montri Rangbah, u Prestone Tynsong da kyntait u wow em ka dorbar kyrpang.
Hawa yatoh wa i ong yong u Prestone wa ka sorkar daw khut ko ya ka yalang yong waroh ki seiñ saiñpyrthai hajrong ka Roster waka Reservation Policy, neiliang uwa yahkhmat ka VPP da ong u wa ka Party smat ko wow yaklam lada khut ya katæ ka yalang.
Da ong u wa lada ka sorkar ha katæ ka yalang ki seiñ saiñpyrthai ym ye ko wow wanrah yei pynkylla yei tkoh hawa pynkrehkaam ya ka Roster System wa ya ka Reservation Policy, wei ym ye ko wow pynbait ha Cabinet, ka Party ym chong klikti ko, tangwa daw lai bait cha ki paidbah.
Hawa yatoh wa i pyrchah kiwa na Garo Hills ya ini i dawa, u Dr. Myrboh da ong u wa i pyrchah ym mut wow kut noh ini, neibhah ka sorkar hap ko wow pait ya kitæ ki yurim kiwa chnongnia wei hap wow pait leh yei chongnia lane ym em itæ i pyrchah.
