Ka Joint Action Committee (JAC) ka chnong Nartiang, West Jaiñtia Hills District wa kynthup yaka seiñ FKJGP, MPUF, JSU waka JPWO kiwa haap hapoh u pood u ang ka thaaiñ Nartiang, hadien i booddien yong ki yaki Scheme pynroi waphær waphær wa da pynkreh ha Nartiang Durga Temple lyngba ka chnat Tourism yong ka sorkar jylla, khana ki wa da chem ki chiboon i wym biang i rukom kreh manda wyrchaw ki waka poisa wa da mang wa ki kreh wada pynkreh ha kani ka thaw.
Kani ka Scheme toh kawa da mang da ka sorkar pyrdi lyngba ka Prashad Scheme wa da tip kam ka “Prashad Scheme at Nartiang Shakti Peeth”.
Kini kiwa yahkhmat ka JAC khana ki wa ka chnat Tourism ka sorkar jylla haka 19 tarik u Naichiphaw 2020 da khut Tender ki neibynta ki kreh waphær waphær ha ka mang poisa wa T. 4 klur tam heiwa da booh leh u pyndep hapoh 18 bnai, tangwa na ki daw wym ye u kiar da pynyinsur noh hadooh u bnai Wisu (March) uni u snem.
Neitæ hadien wa i por wow pyndep da kut i wei neidaw wa boon ki kreh da chem toh iwa khalær kamjooh leh em kiwa dang sahteiñ, kamtæ ka JAC da thooh yutip ko lyngba ka RTI wei chem ko yei joor i bamtooh heiyatoh wa kani ka Scheme neibhah ka mang poisa wa ki kreh waphær waphær wa da pynkreh ym em yahaap ki.
Wei najrong wym yahaap i rukom pynkreh waka mang poisa, khana ki wa em leh ki kreh ki wym em hi wot tang u kreh leh iwa da kynjooh duna T. 2 klur tam. Kitæ ka ‘Site Development with Landscaping’, ‘Drinking Water’, ‘Solid Waste Management’, ‘Resting Shed’, ‘Illumination of Nartiang Monolith’ waka ‘Illumination of Nartiang Shakti Peeth’.
U Bin Raliang, Chairman JAC uwa man leh u President ka FKJGP Nartiang Area Unit hawa klam ong u wym em yumut u wanrah Scheme ha chnong yong i du yow myntoi samen katwa ki paidbah won wym yoh ki yei hok wa toh u yoh.
Da phah haroh u ka khubor cha ka sorkar deiwa ong, “Ham pynman yaka Nartiang kam ka thaw kamai spah ki bru samen næ yong ka chnat Meghalaya Tourism Development Corporation (MTDC)”. Kyntu haroh u wow kreh hok katkam ka mang poisa lym kamte ka JAC daw lai ko chakhmat.
U Chalbestar Myria, Secretary JAC uwa man leh u Education Secretary ka MPUF Central Body, da pynsñiaw u i sñiawsih neibhah wa naka T. 4 klur tam ka mang poisa da pyndep yei kreh du 4 tylli donhi iwa kynjoh du T. 2 klur tam.
Ha kani ka sngi da emlang leh u Andy Sumer, General Secretary JSU Nartiang Circle, u Rimioo Nongtdu, President ka JPWO West Jaiñtia wa kiwi.
Chwa ini, ka JAC da dep e chithi haroh ko cha u Lat ka jylla, cha u Asst. Engineer ka MTDC Shillong, cha u Managing Director ka MTDC Shillong, cha u Commissioner & Secretary ka chnat Tourism ka sorkar jylla cha u MLA ka thaaiñ wa u DC ka West Jaiñtia Hills tangwa ymem wa chimkhia hajrong kani ka kaam.
