U Montri Rangbah ka jylla, u Conrad K Sangma ynne ka sngi da ong u wa da yaklam u wa u Montri Rangbah ka Assam, u Himanta Biswa Sarma kamwa chiphaw sien ha ki soo sngi kani ka tayaaw hajrong i jia ha thaaiñ khappood ka West Jaiñtia Hills.
Hawa klam wa kiwa thoh khubor, u Conrad da ong u wa hei yong sakhiat, da pynkhreh wow lai jngieh cha ki thaw khappood wa u Montri Rangbah ka Assam tangwa na ki daw wym ye u kiar khlem da yoh wow lai pait tangwa daw lai ha kini ki sngi wow wan hadien ka 15 tarik uni u bnai.
Da ong u wa i yaklam wa ka Assam hawa yatoh wa i booh khyrdop ka KAAC ha thaaiñ Khanduli da wanrah yei huri hura ha katai ka thaaiñ khappood wei u Montri Rangbah ka Assam dang yaleh u wow pynbait noh ya ini i kaam.
Kam wow pynkynmoo wa kani ka kaam ha khappood da sdang ko wow heh hadien wa mih ka seiñ kieñ suloi ki Karbi ha katai ka thaaiñ yow pynsyier ya ki Pnar wa sah ha khappood wa ki District ka Karbi Anglong wei hajrong ini, u Conrad da ong u wa da dep wow yaklam wa u Himanta wei daw yang kammon rai ki.
Discussion about this post