U Montri Rangbah ka jylla, u Conrad K Sangma ynne ka sngi da kyntait u wow klam iyi iyi hajrong i chah pynngat mukotduma ki 12 ngut ki MDC wa kynthup ya u MLA ka NPP, u Sanjay Sangma ha ka Meghalaya Lokayukta.
Hawa pyrchang kiwa thoh khubor wow kylli, u Conrad da ong u wa ym kwah u wow klam iyi iyi kattæ chooh neibhah kani ka kaam dang em ko hapoh i kti ka Kachari wei ym man iwa biang wow klam.
Kam wow kdaw heini wa ka Meghalaya Lokayukta da pynngat ko ya ki 12 ngut ki bru wa kynthup lang leh ya u MLA wa katni naka Party NPP, 9 ngut ki Executive Member warim wa u Secretary warim ka Garo Hills Autonomous District Council (GHADC) najrong ki arngut ki Contractor, hajrong i wym ye u pyndep yei chna ya ka MDC Hostel ha Tura, kawa da mang hadooh T. 6,01,31,100.
Ka hukum wa da pynmih ha ka 28 tarik u Naiynñiaw, u chongknor yong ka Meghalaya Lokayukta, u B. Dhar da ong u wa da wanrah ya ka Case Record ha katai ka sngi, deilang ka Report yong ka takit wa da leh da u Anil Sangma, MPS (Retd), uwa man leh u dkhot ka Inquiry Wing ka Meghalaya Lokayukta.
Kini kiwa chah bichaar da chah pynngat katkam ka kyndon wa 12 wa 13 yong ka Prevention of Corruption Act, 1988.
Kini kiwa chah pynngat, kynthup ya u CEM warim ka GHADC, u Denang T Sangma wa 8 ngut ki MDC warim wa kynthup ya u Augustine R Marak, u Brilliant R Sangma, u Dipul R Marak, u Kurosh M Marak, u Winningson Ch Marak, u Dolly K Sangma, u Bhupen Hajong wa u Sukaram K Sangma.
Kiwi won kynthup ki ya u Secretary ka GHADC, u Hewingson A Sangma wa arngut ki Contractor, u Sanjay A Sangma wa u Dolrich D Sangma.
Discussion about this post