Kam chibynta wow wanrah ya ki buit wa thymme wow pynlang yei jhep, da pynman yei pynyoo paidbah yeini ha Kyndong Rella wa em ha thaaiñ Mawdun ka Umiam kawa man leh kam ka thaw wa pawnaam bha wa kiwa uiñke suwari ha Meghalaya.
Yeini da yahkhmat da ka sorkar Meghalaya hapoh ka Smart Village Movement (SVM) deiwa ya krehlang waka Clearbot kawa chna ya ka jiat lien Robot deiwa pynemkaam yei stat AI kawa ye wow pynlang ya ki jhep kiwa pær ha ka um.
Ya ini da pyrchang waroh chi tayaaw wei da pykut ha ka 25 tarik uni u bnai deiwa sakhilang kiwa boon wa emkti lang yow ye u leh yeini i jooh ha kiwi ki bynta ka jylla.
U Ramkumar, IAS uwa man leh kam u Nodal Officer ka Smart Village Village Movement da pynsñiaw u yei kmen wow yoo yeini dei khmat wa da krehkaam i kamwa da thmu yow pynkhooid ya ka rym-aw.
Neilang u Siddhant, uwa sdang ya ka Clearbot da ong u wa kmen u wow yoh u ya krehlang waka Smart Village Movement yow pynkhai im biang ya ki um ki wah ka jylla Meghalaya.
U Tulenam, Fellow ka UC Berkeley wei kam u Director of Operations ka SVM ha Meghalaya, da pyntip u wa yeini da pyrchang nyngkong ha Bali, Indonesia neibynta ki thaw uiñke suwari wei ha Meghalaya leh toh i jooh i thmu ha kiwa boon ki thaw uiñke suwari.
Uwi na kiwa jooh khwe ha kani ka thaw da ong u wa da boon kiwi ki thaw leh wa lang i jhep kamni wei da chem chitom ka sorkar leh wow pynkhooid ya ini i jhep najrong wym biang leh i rukom pynlang jhep.
Kani ka Clearbot toh kawa ye u taan lang 15 litre yei phñiang wa em ha ka um wa 200 Kilo i jhep man-ka-sngi.
Hadien wa pynyoo yei krehkaam kani ka lien da ye wow pynlang 250 Kilo i jhep hapoh le kynta.
Ha kani ka sngi da emlang leh ki bru ka Meghalaya Energy Corporation Limited, ka Meghalaya Tourism Development Corporation, ka chnat Tourism, ki bru ka Municipal, ki waheh chnong, kiwa khwe wa kiwa chong chong ka Mawdun.
Discussion about this post