Ynne ka sngi, ka State Council of Science Technology & Environment, Meghalaya chirup i krehlang waka yung krehkaam u District Planning, West Jaiñtia Hills da pynman ki yaka rynsan yakob wa tip kam ka District Level Children’s Science Congress ha District Library, Jowai hajrong ka phang “Understanding Eco-system for Health & Well-being”.
Ya kani ka yakob da kyrchaan daka National Council for Science and Technology Communication, Department of Science & Technology, ka sorkar India waka chnat Planning yong ka sorkar Meghalaya.
Hei klam yahkhmat u Dayamon Diengdoh, Programme Officer naka State Council of Science, Technology and Environment, Shillong ong u kawa kam kani ka rynsan yakob man kawa emkaam bha yaki khynnah skur neibhah yarap ko u kyntu kynrong yei tip i chemphang ha ki, wei lyngba i tip i chemphang wa yoh ki na kam kani ka jait yakob yarap ko leh ya ki hei lai luti wa chakhmat i im ki.
Ha ki kynta wa ki khynnah skur waphær waphær pynyoo batai ki yaki mat wa ki da pynkhreh kyrpang ki, neiliang ki ar ngut kiwa bichar, u C.P. Syiem, Rtd Research Officer ka S&T Cell Planning Department wa u Rahul Chatterjee, Core Committee Member, SCSTE uwa man leh uwa sikai ka Jail Road Boys’ Higher Secondary School, Shillong da chim haroh ki ka laad wow pynyoo pynkdaw wei e yumut yaki khynnah katkam ka phang wa wanrah ki khnang yow ye u pynpliah chooh chooh ki chaphrang neibhah i lai luti ki wym kut du heini.
Ha kani ka yakob napyrdi ki kyrdan Junior Category da jop daka Marian Hills Higher Secondary School katwa haka kyrdan ki Senior won da jop ka St. Peters Secondary School, Barato, ka Modern Secondary School, Ialong, ka North Liberty Higher Secondary School, Jowai waka Adventist Higher Secondary School, Khliehtyrshi wei kini daw mihkhmat won ki yaka West Jaiñtia Hills cha ka State Level Children’s Science Congress ka wow man haka 14 wa 15 tarik u Khonchonglad (Nov), 2023 ha Shillong College.
Discussion about this post