Chah thok ka manbei Rs. 1,30,000 ha uwa kular wow pynyoh kreh sorkar

Kawi ka manbei da chah thok ko ha uwi u bru wa da kular wow e kreh sorkar heiwa da chim ko da ka ram kawa Rs. 1,30,000 yow yoh yeini i kreh.

Uni u bru toh uwa kam ya idæ kam u bru chipai wei da kular u wow e kreh ya ka kam kawa lum wa pynkhooid wei u e kreh leh ya ka khon yong ka.

Kani ka manbei toh kawa sah ha chnong Mynthlu, East Jaiñtia Hills District wei da yachem ko wa uni u bru wa kular kreh lyngba ka Facebook wei i pyrtuid u toh u Dakermi Shadap iwa ymtip lada toh i pyrtuid tre u wei da ong u toh uwa sah cha thaaiñ Ri-Bhoi.

Uni u bru da yoh u yei chaniah kani ka manbei deiwa wan ke u chadooh cha yung wa sah ko.

Hadien wa da sdang khlan i chaniah, uni u bru da kular u wow pynyoh kreh ya kani ka manbei deilang waka khon ko wei da paan u leh yaka poisa kawa Rs. 1,30,000 yow pynyoh kreh sorkar. Neidaw wa kini ki chi bei chi khon toh ki wym em kreh, da kmen ki yei kular wow yoh kreh sorkar heiwa da chim syndon ki da ka ram yow e cha uni u bru.

Related posts

Yoh kem ki paidbah ya le ngut kiwa suba tooh kari

February 13, 2026

Chah dung uwi ha Sahsniang

February 11, 2026

Tangwa hadien wa yoh ya kani ka poisa uni u bru da wiar u ngeiñ kamwa 3 bnai wei da wan mih biang u yow paan poisa pathan na kani ka manbei yow pynchna ya ka kari u kawa chah tyrrah.

Dei wym chaniah de ya uni u bru, kani ka manbei da kyntait ko wow e deiwa ong wow leh chwa yeiwa kular u wei hadien ini da wiar hi-wot u kattu la 10 bnai wei manda pyrchang wow Phone leh ym yoh de wei ka Facebook Account kawa jooh pynemkaam u leh ym em de ko.

Ini waroh da pynsñiawsih i ya kani ka manbei waka khon kiwa kattu da sah sa ka ram najrong wa chah thok.

Kamtæ da e por chi tayaaw ya uni u bru wow wan pynuiñ yaka poisa waki kot ki sla wa da chim u wei lada ym ye u wow pynuiñ hapoh chi tayaaw daw lai ujor noh da ka FIR cha ki pulit.

Da kyntu leh ya kiwi lada em wa tip ya uni u bru wow wan ki chakhmat wei da sneiñ leh ya ki wym toh u chah pynbiej ha kam kini ki jaitbru.