Ka yung krehkaam u District Sports Officer, West Jaintia Hills chirup i yakrehlang ka West Jaiñtia District Sports Association nadooh ka 20 tarik hadooh ynne da pynman ki ya ka Open Volleyball Tournament 2024 ha madan Biar wa em ha Mission Compound, Jowai.
Ya kani ka Tournament da wan ya chimbynta da 8 tylli ki liang wa kynthup ya ka Lion Mission Compound Sports and Youth Affairs, Khimusniang, Iakrehlang Nangbah SC, Madankynsaw Mowkyndeng Knorsyiem, Kiang Nangbah Govt. College, Spikers, Chullai Brothers Chutwakhu waka Lion Mission Compound Dorbar Chnong.
Ki ar tylli ki liang kiwa da poi cha ka Final ynne wow yaknieh yei naam jop toh ka Iakrehlang Nangbah SC waka Madankynsaw Mowkyndeng Knorsyiem heiwa da jop ka Madankynsaw Mookyndeng Knorsyiem da 25-15, 25-17.
Ya kani ka Final da wan sakhilang da u EMH Passah, Working President WJDSA kam u kongsan hei emlang u Khroobok Passah, DSO, West Jaiñtia Hills, u Patrick Lamare, Vice-President WJDSA, u Lammat-O Laloo, General Secretary WJDSA, u P. Khyriem, Waheh Chnong Lion Mission Compound wa kiwi kiwa chah khut sñiawbha.
U EMH Passah hawa e kyntien da ong u wa ka West Jaiñtia District Sports Association thrang angnood ko wow kyntu kynrong ya ki kaam yalehke hapoh ka District kamtæ da kyrsu kyntu u ya ki dong ki chnong wow ya chimbynta ki ha ki yakob waphær kiwa ka WJDSA khut pynman ko na ki por cha ki por.
U Khroobok Passah hei klam da ong u, i pynman ya kani ka Tournament man ko chibynta wow yoh ka District ya ki khynroo wa emsap ki wow mihkhmat ya ka District cha ka Meghalaya Games wow man ha Tura nadooh ka 15 tarik Duyatra 2024.
Chooh chooh ong u wa i pynman ya kani ka Tournament u pteiñ i na ki snem cha ki snem wei da ong u leh kani toh ka Tournament kawa ye u ya chimbynta da kiwon kiwon ki chnong næ ki seiñ yong lok kamtæ kyrsu kyntu u ya ki khon khynroo ka District wow chim ki ya kani ka kabu ksiar ha u snem wow wan.
Discussion about this post