Ka chnong Narwan kawa em ha East Jaiñtia Hills District kawa man leh ka chnong wa da bna naam hei rep i pynmih soh Khontara lyngba i thiang u soh hadooh wa da poi u leh chadooh Dubai deiwa yahluti ka sorkar lyngba ka chnat i rep i riang, wei ya uni u soh ye u yoh hadooh u bnai March.
Kamtæ ha kani ka kynti ka chnong Narwan lyngba ka Narwan Multipurpose Co-Operative Society Ltd da chim ko ka laad ka luti u pynsah naam yow soh wa mih na kani ka chnong dei wow pynman yaka tamasa wa arsngi wa tip kam ka “Narwan Orange Festival” haka 30 wa 31 tarik uni u bnai January ha madan Mooknor Narwan, East Jaiñtia Hills District.
Ka chnong Narwan toh kawa haap hapoh ka Sutnga Saipung Constituency, kawa jngai kamwa 95 Km na nongbah Shillong wei 34 Km na Jowai.
Heiyatoh wa kani ka tamasa neiliang u waheh chnong ka Narwan, u Lamsuk Langstang kamjooh u Secretary Chnong, u Leo Shadap pyntip ki wa i pynman ya kani ka tamasa toh chibynta u e laad ya ki paidbah u pna wan sakhi ki yaki thaw rep soh wa da sikai da ki phaw snem chadien ha kani ka chnong, najrong wow pyntipmit leh yaki thaw wa yoosuk wa em haka chnong Narwan.
Da ong leh wa ha kini ki ar sngi wa pynman tamasa daw em boon ki jait pynwyrngia yaki paidbah wa kynthup nadooh i rwai i siaw wa daw chimbynta da kiwa rwai wa bna naam ka District waka jylla.
Haka sngi sdang ka 30 tarik daw em ka Marathon, ka pynsñiawthooh paidbah heiyatoh i sih i pynemkaam drugs, ka Trekking, i pynyoo paidbah yaka phlim NUKSA, ka Fashion Show wa i rwai i siaw i put i tem.
Ka 31 tarik won ka sngi wa bood daw em ka Cycle Race, i hiar lai pait yaki thaw rep soh Khontara, ka yakob khoh soh Khontara, wei daw em leh ka yakob Miss Narwan Orange Festival 2024 najrong kiwi won ki jait pynwyrngia.
Discussion about this post