Ki yalehke yakhun kti ka 5th Meghalaya Games da pynhun i jrup ya ki paidbah wa wan paitke kiwa da pynman ha Don Bosco Junior College Indoor Arena, Tura ynne heiwa i yaknieh jop ya waroh da man ko kawa chongchit ym du deiwa sai yei bor tangwa kamjooh i sap i buit.
Napyrdi kiwa yalehke, ka East Khasi Hills wa South West Khasi Hills da wan ki hakhlieh dooh deiwa kheiñ Point deiwa yoh mar artylli ki Takma Ksiar katwa ka West Khasi Hills, Eastern West Khasi Hills, West Jaiñtia Hills wa East Garo Hills da yoh ki mar kawi ka Takma Ksiar.
Ha ka yakhun yong ki kynthai kiwa hapoh i khia 55 Kg, 60 Kg wa 60 Kg chaneiñ, ka Pynsuklang Lyngdoh na Eastern Wet Khasi Hills, ka Olivia Dkhar na West Jaiñtia Hills waka Rikka Ch Marak na East Garo Hills da sai ki yei buit i bor yong ki yow yoh ki naam jop yow yoh Takma Ksiar.
Neiliang ki chynrang, u Brandon Tariang na East Khasi Hills da jop u hei khia 85 Kg katwa u Mebansan Sangma na South West Khasi Hills da jop u hei khia 85 Kg.
Manda yakhun yei naam Champion of Champions, u Pynskhemborlang Marngar na West Khasi Hills da jop u ya ki chynrang hei 75 Kg katwa neiliang ki kynthai da jop ka Olivia Dkhar na West Jaiñtia Hills hei khia wa 60 Kg.
Discussion about this post