Ka Mizoram da jop yaka Meghalaya da 191 Run haka sngi wa soo kawa man leh ka sngi wa khaddooh ka Ranji Trophy wa da pynman ha Anand, Gujarat ynne ka sngi.
Ka Meghalaya da emkaam ko 316 Run yow jop tangwa da haap lut ki Wicket deiwa kamai 124 Run. Ka Mizoram da pynkut ko yaka Innings wa ar deiwa kamai 237/9 deiwa sah 58.4 Over yow pynhaap ya kiwa Bat ka Meghalaya.
Kam wow pynkynmoo wa ka Mizoram da kamai ko 359 All Out haka Innings wa nyngkong heiwa ka Meghalaya da jubab ko deiwa kamai ko 281/10.
Haka Innings wa nyngkong, da lehbha kiwa kawang bol ka Mizoram kiwa kynthup ya u KC Cariappa (4/48), u Thankuma (3/34) wa u Mohit Jangra (2/36).
Kam wow kdaw heini wa ka Meghalaya Cricket Association ha uni u snem da rai ko wow pynyalehke du da kiwa chong chnong ka jylla ha kani ka Ranji Trophy.
Na kiwa Bat ka Meghalaya, u Arien Bonchang Sangma da yaleh u wow neh slem katwa ye u deiwa neh im 149 tylli ki bol, iwa mut da yieñ u wow Bat 24.5 Over tangwa da kamai u 26 Run donhi iwa boon dooh na kiwa Bat ka Meghalaya haka Innings wa ar. Kiwe de kiwa ye u poi cha ki 20 Run toh uwa Bat hei chiphaw, u Dippu Ch Sangma (24 na 21 bol) wa u Jaskirat Singh Sachdeva (21 na 41 bol).
Ka Meghalaya kattu da jop ko arsien wei da rem ko leh arsien wei daw yaleh khaddooh ko pyrchah yaka Sikkim ha Rangpo, Sikkim nadooh ka 2 tarik u Thohlakhmi. Ka Sikkim leh da dep jop ko arsien wei da rem ko leh arsien kam ka Meghalaya hi.
Discussion about this post