Pyrchah u MP ka Mizoram yei pynkut yei psiah i mih laitlooid waka ri Myanmar

U MP Rajya Sabha ka Mizoram, u K. Vanlalvena ynne da ong u wa ym chah ya oo wow klam u hapoh Parliament hajrong i rai wow pyndam noh yei lai laitlooid namo ka Free Movement Regime (FMR) ha tymbud u pood ka India waka Myanmar hanla da dep booh Application u hapoh ka Zero Hour la soo sien.

Da ong u leh wa ini toh i kaam wa khia biah ya ki jylla wa em pood waka Myanmar tangwa ki MP wa man kam ki jaitbru ri-loom ym e laad ya ki chi minit leh wow klam hajrong ini.

Neiliang u Vanlalvena da phah u leh yaka dorkhat cha u Home Minister, u Amit Shah ynnin ka sngi hajrong ini i rai ka sorkar pyrdi wow pynkut noh ya ini i yoh i lai i wan deiwa laitlooid.

Haka dorkat da ong u wa ini i rai ka sorkar pyrdi hadooh wow kær noh ya u pood waka Myanmar toh iwa da leh khlem da pynman yaka sorjamin neibhah u pood toh uwa da liar hi-eh da ki British khlem da tip yei yong sakhiat i long i man.

Related posts

Da boonsien dep u yasyllok wa kiwa chongdai madan, phylla u Paul yei pynbaad wa leh yabor

November 24, 2024

Da 4 lak tam ki Vote jop ka Priyanka Gandhi ha ka Election wa nyngkong yong ka

November 23, 2024

Na ini i daw wa leh ki British, ki Mizo da pynbor ya ki wow sah ha ki le tylli ki ri ha itu i por kitæ ka India, East Pakistan wa Burma wei heipor wa yoh laitlooid da chim bait ya uni u pood wa da liar ki British kiwa da leh bakla wei hadooh katni ki sngi ki Mizo da haap ki wow maad yei chitom.

Da ong u wa ki Mizo da kwah ki wow pynbait noh ya ini i bakla yow ye ki u sah hapoh kawi ka bor sorkar tangwa dei rai ka sorkar wow kær ya u pood daw pyndooh noh ya ini waroh wei daw pyndooh leh yei chah wow lai ki Mizo wa em cha Myanmar hadooh 16 Km chapoh India kamjooh ki Mizo wa em ha India yow lai chapoh Myanmar.

Da kdaw u leh wa ki Mizo wa em ha waroh arliang u pood da im ja ki deiwa ya khayi lang la 75 snem kattu khlem da em wa pynthut wei deiwa pyndooh noh ya ini i yoh u lai liatlooid daw ktah joor ko ya waroh arliang.

Chooh chooh da ong u wa lada i thmu ka sorkar wow kær pood toh yow khang laad yei khayi tooh ya ki mar wa boon jait, tangwa ha u pood ka India wa Bangladesh uwa da dep kær leh ym ye wow khang yeini wot deiwa em ki chipai wa pait wa yoo.

Deiwa kær daw pyndooh ko ya kitu kiwa jooh im-ja deiwa khwe neibhah ym yoh de ki wow lai cha ki rood wah, cha ki thaw rep iwa da pyndap pynbiang yeiwa emkaam ki wei lada kær ya u pood waka Myanmar daw dooh 500 Km ki thaw khwe wa ki thaw rep.

Kamtæ da kyntu u ya u Amit Shah wow pyrkhat deiwi ya ini i rai.