Ka sorkar Meghalaya haka yachem lang ki Montri sorkar da mynjur ko yei pynkylla yaka Meghalaya Building Bye-Laws 2021 neibynta i bha i miat ki thaw wa em cha sor.
Hawa pyntip chaphang ini, u Montri Rangbah ka jylla, u Conrad K Sangma da ong u wa ini pynkylla toh deiwa bood leh ya ki kyndon wa da booh da ka sorkar India.
Chooh chooh da ong u wa ini i pynkylla man ko leh yow pyntikna wa ki yung ki sem man ki kiwa chngaaiñ wei kamjooh leh kiwa em thaw da iwa khian yow ye ki u pynemkaam bha yei thaw ki neibhah nachwa da em ki kyndon katwon u jngai iwi i yung na iwi nakhmat, nadien wa na chrooh. Wei yeini da pynkylla yow ye u rap pynheh kamjooh i jrong ki yung.
Da pynyklla leh ya ki jait yung wa ye u chna ha ki thaw wa man chariñ palat 50 Dergree deiwa em ki kyndon.
Ka sorkar India da booh bhah ko Rs. 15,000 klur kam chibynta ka Special Assistance for Capital Investment neibynta ki thaw wa em cha sor wei da booh ko leh ki kyndon kamtæ da hap wow leh yeini yow yoh ya ini i yarap.
U Conrad da ong u wa ka sorkar da booh ko i tyrwa cha ka sorkar pyrdi yow paan Rs. 619 klur na kani ka Rs. 15,000 klur wei da mynjur wow e awjan Rs. 500 klur wei da yooluti wa daw yoh sa kamwa Rs. 100 klur.
Kamtæ da yooluti wow yoh ka Meghalaya Rs. 597 klur wei lada ym yoh yaka Rs. 100 klur da yooluti wow yoh bait Rs. 497 klur yow pynbha pynmait ya ki sor neibynta uni u snem mang tangka.
U Conrad da ong u wa ki jylla wa heh kam ka Uttar Pradesh wa Assam leh da yoh ki kamwa Rs. 500 klur.
Ka sorkar ynne da mynjur ko leh yaka Shillong Urban Mobility Policy 2024 kawa man leh kam chibynta wow pynkhreh yow yoh ya ini i yarap naka sorkar pyrdi.
Discussion about this post