I yoh laitlan ki baar jylla wow chong u sah wow chna chnong hapoh sor Shillong da pynman i yaka Hynniewtrep Youth Council (HYC) wow sñiawkhia heiwa ynne ka sngi kiwa yahkhmat ka seiñ da lai pait lai sylli ki ya kawi ka thaw wa ki baar jylla da pynman chnong ki hajan ka Ajmera kawa em cha kylla ka Them Ïewmawlong.
Ha ini i lai hiar ka seiñ da chem wa katai ka thaw toh kawa jakhlia bha wei da chem leh wa ki baar jylla da chong ki pyrchah aiñ ha katai ka thaw.
U President ka HYC, u Roykupar Synrem da ong u wa ka seiñ daw tied chwa ko ya ki tre thaw, neibhah ini i chna chnong pyrchah aiñ toh hapoh u pood ka Shillong Municipal Board waka Shillong Contonment Board.
Da ong u leh wa ka seiñ daw dawa ko na ki bor ka Cantonment wa toh u sai noh ya kiwa chong wa sah pyrchah aiñ ha katai ka thaw wei da ong chooh chooh wa daw dawa leh na ki bor sorkar wow leh ki yeiwa emkaam hajrong ini i kaam neidaw wa da booh ko hei maa ya kiwa chong chnong ka jylla.
Da khana u leh wa em kiwa dai drugs kiwa sah ha katai ka thaw wei mar ya yoo ki ya ki dkhot ka seiñ da yut ki noh ki wei ini da pynyoo ko wa man ko kam ka thaw rieh kini ki bru wei daw booddien wa kam kini ki bru ym yoh ki wow sah ha katai ka thaw.
Katkam i chem ka HYC ki yung kiwa em hapoh 100 tylli ha katai ka thaw da yoh ki leh yei bordiñ, wei hajrong ini ka seiñ da kylli ko leh yaka MeECL kawa da leh chiliang deiwa e bordiñ da ki phaw snem, wei ileh ki bor sorkar da leh thlah ki ya kitai ki bru wa sah pyrchah aiñ da ki phaw snem.
U Roykupar da khana u wa i lai pait ya kani ka thaw toh hadien wa ka seiñ da yoh ko boon ki ujor neidaw wym man chngaaiñ ya kiwi kiwa chong chnong kiwa lai wa yieñ najan katai ka thaw.
Discussion about this post