Lada ym yoh umkor leh ye wow ujor cha ka Meghalaya Human Rights Commission

Lada jia wym yoh umkor dei tista næ ki kaam wa pynkreh ka sorkar ym ye wow pyndep ki heipor wa biang, kiwa chong chnong ye ki wow lai ujor cha ka Meghalaya Human Rights Commission yow leh ko yeiwa emkaam.

Hawa boon ki por da jia wa chah tyngkheiñ i hok manbru tangwa boon ki bru ym em wan ki hakhmat ka Meghalaya Human Rights Commission.

Yeini da ong da u Chairperson ka Meghalaya Human Rights Commission, u Justice (Rtd) T. Vaiphei, wa ki bru ym wan ki chakhmat wow ujor yow suk ki heithaw wow yaleh da ka mukotduma kawa chitom ki bru wow booddien.

Da pynche u leh wa i bor ka Commission ye ko wow chim yei kaam lada i ya kajia toh hapyrdi ki bru wei rap bha chooh chooh lada toh ki kaam wa chah ktah ki paidbah wa boon.

Related posts

Da chim ya ka Statement u pulit wa yah ya ka kari wa ya tyrrah wa ka thuk-thuk

November 24, 2024

Thung ka sorkar da ka Committee yow pynthymme noh yei rukom krehkaam ka MPSC

November 24, 2024

Ka Meghalaya Human Rights Commission kawa da krehkaam nadooh u snem 2017 da yoh ko 214 tylli ki ujor heiwa da ye wow pyndep 108 tylli katwa 110 tylli toh kiwa dang sahteiñ.

Ka Commission da em ki por da chim ko ha ka hi wow ujor namo ki Suo Moto Case kiwa da leh ko 57 tylli wei 22 tylli toh kiwa da ye u pyndep katwa 35 tylli toh kiwa dang sah.

U Chairperson da ong u wa duna bha ki ujor wa poi cha ka Commission ha Meghalaya neibhah tang 10 tylli leh ym jooh em poi hapoh chi bnai hawa nujor wa ka Assam khamtam ha ki thaaiñ Barak heiwa ki bru da lai mih ki cha ka Assam Human Rights Commission deiwa e 7-8 tylli ki ujor man-ka-sngi.

Da pyntip u leh wa ha Meghalaya da em boonsien wa kiwa ujor da yoh ki yei hok hadien wa ka Commission chimkti ko yei kaam.

Kamwa man kattæ da dep wow su Rs. 33,51,000 cha kiwa ujor ha ki 11 tylli ki kaam wa da chimkti da ka Commission.

Heiyatoh wa i yap ki 6 ngut hapoh ka krem mooyong, kiwa ha-yung ki da yoh ki mar Rs. 5 lak wei ha kawi won wym em chimkhia wei leh khalær ka Hospital, kiwa ujor da yoh yoh ki Rs. 3 lak.

Da phah su leh mar Rs. 2.5 lak neibynta ki ar ngut kiwa chi payu kiwa khlaad nei chah riñ hei bordiñ ha West Khasi Hills wei da phah su leh Rs. 5 lak cha kiwa ha-yung uwa yap heipor wa chah kset ha ki pulit.

Hawa pynche chooh chooh yei bor ka Commission da ong wa ym du heipor wa chah pyndik ha ki pulit, da ong u ha Assam kiwa chong chnong lada dooh umkor ki leh da lai ujor ki cha ka Commission wei hadien ini ki bor sorkar da chimkhia ki yei kaam.

Da ong u leh wa ki paidbah ye ki wow wan cha ka Commission heiyatoh wa ki kaam ka MGNREGA nei kiwon kiwon ki kaam wa da pynkreh kiwa da leh khlem biang.

Da pynche u leh wa ka Commission ym ye ko wow pynthut yei takit ki pulit tangwa ye ko wow pynchitom ki lada ym leh ki yei kaam yong ki deiwa biang.

Hanla iwa phah da ka Commission ymtoh iwa hap ka sorkar u bood, tangwa da ong u wa ka sorkar Meghalaya toh kawa bood yeiwa ong ka Commission u leh.

Da khana u leh wa kattæ ka Commission da chimkhia ko yeiwa jia chah slaitbor ki ar ngut ha South West Garo Hills, i pasi uwi hapoh thanat, i chah pynyap ki le ngut deiwa chah thang ha Garo Hills wa kiwi de heiwa da paan Report na ki SP yeini wa jia.

Tangwa da ong u wa ka Commission ym ye ko wow pynwit næ tuklar ha ki kaam yong ki thaw wa pynlai da ka sorkar pyrdi kam ka NEHU, NEIGRIHMS wa kiwi de wei ya kini ye kow lai ujor cha ka National Human Rights Commission.