Ka seiñ Hynñiew Achik National Movement (HANM) ynne i step da lai ko wow wah wei kdoh Banner ha kylleiñ ka nongbah Shillong yow pynkhyrngiat biang ya ka sorkar hajrong ki mat wa dang sahteiñ khlem lai chakhmat.
Ki dkhot ka HANM East Khasi Hills da sdang ki yei kdoh Banner hei step ha kiwa boon ki thaw wa kynthup ha khmat yung wa sah u Montri Rangbah kawa em ha Polo wa ha Sawmer Upper Shillong, ha ki kynroh wa khyrdop ka Secretariat, hakhmat u mot u Kiang Nangbah hajan Civil Hospital wa ha Khyndailad wa Motphran.
Ha kini ki Banner, ka HANM da pynkynmoo ko ya ka sorkar hajrong ka mat Inner Line Permit (ILP) deiwa klam che wym toh u pyrkhat wanrah luti rel lada ym ye u wanrah chwa ki aiñ yada.
Kawi de ka mat toh hajrong i pynbait pood wa ka jylla Assam kawa da sangeh khlem pteiñ de neibynta ka bhah wa ar wa dang sah.
Kawi won ka mat wa ka HANM da ther ko ya ka sorkar toh hajrong ka Them Metor ka wym em da leh iyi iyi hadooh katni kawa da sahkut du hei yaklam.
Neiliang uwa yahkhmat ka HANM East Khasi Hills, da kynthah joor u ya ka sorkar heiwa da ong u wa ki Khasi da chah pynsangeh wei chah kyrriah yabor ki na ki thaw wa chongdai ki tangwa kiwa em ha Them Metor hadooh katni ym ye u pynbait, kamtæ da kylli u yeini i rukom leh ka sorkar.
Discussion about this post