Ki khynnah skur ka St. Dominic Higher Secondary School Mowkyndeng da mih ki da ki spah ngut hapoh i yahkhmat u Fr. Richard Louis Rapthap kam u Principal yong ka skur wa u Niwel Dhar waka Marbiangpor Syngkon kiwa man kam ki Tobacco Free Leader wa da thung da ka skur deiwa emlang kiwa sikai skur wa kiwa kreh skur, da pynman ki yei lai paidbah ha soodong ka chnong Madankynsaw Mowkyndeng hajrong ka phang “Tobacco Free in Educational Institution 2024” katkam ka hukum wa da yoh na yung krehkaam ka District School Education Officer, Jowai lyngba i phah ka yung krehkaam ka State Project Director, Samagra Shiksha & Director of School Education & Literacy Meghalaya, Shillong.
Ini i lai Rally man ko leh wow e Wyrta cha kiwa chong chnong yow sñiawthooh wa i dih biri, dih sikret ha ki thaw paidbah, kamjooh i baam khoini pynsih ko ya ka soodong yong i kamjooh i chait i khiah deilang wa kiwi ki jait dih pynmuiad leh ktah ki yei chait i khiah kiwa pynemkaam kamjooh yaka imlang sahlang waroh kawi.
U Fr. Richard da phah u ya ki khynnah wow mih cha ka chnong yow lai e wyrta yow pynsñiawthooh paidbah yei sih i pynemkaam i dih duma heiwa da rah leh wa ki Placard ha kti deiwa kbai leh ya ki kyntien wow maham yei myllien ya kini ki kaam wa sih.
Da yoh leh sneiñ i kroo ya ki khynnah skur na u Waheh Chnong ka Dorbar Chnong Madankynsaw Mowkyndeng, u Danny B Shadap uwa da e yei klam hawa pynkut ya kani ka lai paidbah ha pchem ka skur wei da yoh leh yei kyntu kynpham na u Limos Sayoo kam uwa mihkhmat ya ki bei ki pa uwa man leh u bru wa bna naam ka chnong Nongkynrih.
Discussion about this post