Ki bor pait bor pynlai ka Meghalaya Bharat Scouts & Guides, West Jaiñtia Hills ha ka 16 wa ka 17 tarik uni u bnai da pynman ki ya ka Rajya Puraskar Pre-Testing Camp ha District Headquarter, Jowai.
Ha ki 2 sngi yong kani ka Camp, ki Scouts Master wa ki Guides Captain na ki Unit waphær waphær da wan ki wow e i batai, i sikai ya ki khynnah Scouts-Guides chaphang ki bynta waphær yong ka Scouts-Guides Movement wa kynthup nadooh i rukom kdoh tylle (Knoting & Lashing), First-Aid, Compass-Mapping, Whistle Signal, B.P. Exercise, Camping-Hiking wa kiwi ki bynta wa yatoh wa ka Scouts-Guides Movement.
U Adiam U Bthuh, District Secretary da khana wa ka thong i pynman ya kani ka Pre-Testing Camp toh yow ye chooh chooh ki khynnah u pynjanai pynpliah yei tip yong ki nadooh i rukom pynkreh ya ki Log Book heitæ i rukom wa pliah wa yoosuk wa kiwi ki Practical kiwa hap ki u leh u pynyoo hakhmat ki Examiner næ ki bru stat bru chemphang ki wow wan na kiwi ki thaw.
Chooh chooh khana u leh wa ki khynnah Scouts-Guides kiwa ye u leh bha won ha ka Rajya Puraskar Testing Camp ka wow man ha State Headquarter Shillong nadooh ka 19 tarik hadooh ka 25 tarik u yoh ki leh ya ka Award na u Lat ka jylla kawa jooh e ki man-u-snem ha u Naichiphaw wei ki khynnah Scouts-Guides kiwa yoh ya kani ka Award u yoh laad won ki u chimbynta næ u pynkhreh wow yaleh ya ka Rashtrapati Award kawa man ka Award wa heh dooh yong ki khynnah Scouts-Guides hapoh ka ri India ka wow e da President yong ka ri India.
Ha uni u snem ki khynnah Scouts-Guides kiwa da pynkhreh wow yaleh ya ka Rajya Pursakar Award em ki kamwa 24 ngut ki kynthai wa 12 ngut ki chynrang.
Discussion about this post