U Dolloi uwa man leh kam u Chairman ka Elaka Narpuh, u Manbha Kyndoh da kyrchaan u yei khang ya u sarok NH-6 wa pynman da ka JAC Dong Namchiang, Elaka Narpuh iwa khlem da booh por nadooh ka 19 tarik uni u bnai.
Da ong u wa ym ye u len wa u sarok toh uwa da jæd da pra bha hapoh ka Dong Namchiang nadooh Tongseng hadooh Malidor iwa da wanrah yei dooh nong wa khroo ya ki paidbah hadooh i sahkut ki kari wa joor bha wei da booh leh hei maa ya kiwa lai wa wan lyngba uni u sarok National Highway u wym yahaap de wow khut u National Highway uwa da man kam u sarok khloo uwa da dap sa du ki thlu donhi.
Chooh chooh da ong wa ki paidbah kiwa chong wa sah ha ki bynta ka Dong Namchiang toh kiwa hap wow lai emkaam man-ka-sngi cha Khliehriat nadooh wow lai chim dawai, wow lai dai ya ki mar rep nadooh u soh u pe, u kwai u pathi wei neibynta u lai skur wa ki kaam sorkar.
Kamtæ da ong wa kam u Dolloi heijooh i por u Chairman ka Elaka Narpuh ym ye u wow pait du da ki khmat yei jinjar ki paaid ki raiot yong oo, wei da kyrpaad leh ya ki paidbah ka Elaka hi waroh kawi wow chimbynta wow kyrchaan lang ya ka JAC Namchiang ha kani ka yakhih khang sarok nadooh ka 19 tarik ter ter hadooh wa pynchna ya uni u sarok ha ki bynta ka Dong Namchiang.
Discussion about this post