Kawi ka manbei kawa na East Jaiñtia Hills hadien wa ky’oh syndet u khon ko uwa dang 9 bnai wei joor i yaam i u nei kjut, da pait ko chapoh chy’oh u wei khyrngiat wow yoo yei bynta i khlieh u Pin wa ngooid u khon ko uwa da neh hapoh chy’oh u iwa da jia ynnin ka sngi.
Kamtæ pyn ynnin hi da kit ya uni u khonboo cha Dr. Norman Tunnel Hospital, Jowai heiwa da leh ya ka X-Ray wei da chem ya u Pin uwa dei looid uwa ang, da neh ha u chy’oh uni u khonboo.
Mar ya yoo yeini, u Dr. Benne-Lee Lyngkhoi uwa man u ENT Specialist ka Hospital chirup wa ki Nurse da pynpsiah ki ya uni u khonboo ha Operating Theatre yow sumaar smat.
Da i sap wa pliah u Dr. Lyngkhoi da ye u wow sai suk ya uni u Pin na chy’oh uni u khonboo khlem da pooid deiwa pynemkaam da ka General Anaesthesia donhi.
Neiliang u pa uni u khonboo da e khublei u ya kani ka thaw sumaar kawa da ye u yarap ya u khon yong ki heipor wa emkaam bha.
U Dr. Lyngkhoi da kyrpaad u ya ki manbei manpa wow man kiwa syndong khamtam wow pynjngai ya ki tiar wa khian kiwa booh hei maa ya ki khon ki yong ki kiwa dang hapoh chi snem i rta.
Discussion about this post