Ki ar tylli ki Dorbar Chnong ka Mobakhon wa ka Namdong A da iwi i ya sñiawthoohlang wow pynneh pynsah ya ki dohum dohwah da rai ki wow khang pyrchah yei pynyap khiar ya ki dohum dohwah kiwa em ha ka wah Mynsning ter-ter hadooh Umphamiang wa hadooh ha Dam.
Ya kani ka rai wow ya krehlang da chim ha ka yalang kawa da pynman ha ka chnong Namdong A ha ka 14 tarik uni u bnai deiwa emlang ki dkhot chnong waroh arliang hapoh i yahkhmat u Waheh Chnong ka Mobakhon, u Pros Dkhar wa u Waheh Chnong ka Namdong A, u Dawan Lyngdoh.
Ki jait kaam wa nang e laad u leh ha kani ka wah toh du kat kiwa khwe, kiwa eiñ/diang khnam wa kiwa tong lun. Da khang pyrchah wow diang paron, diang jaar, u dat diñ dat bomb, u choh u wieh da ki jait dawai bih wa pynbiej wei kiwa pynyap ya ki dohum.
Da rai wa ya kiwa leh pyrchah daw pynchitom katkam ka aiñ, wei daw e nong leh ya kiwa chem næ khana ya kiwa yaleh pyrchah, kamtæ da kyntu ya kiwa chong chnong wa ki marjan chnong kiwa jooh leh yeini i kaam cha kani ka wah wow chim phi ya kani kam i pyntip wow sangeh chisiendon yeini i kaam.
I pyntip na ki ar waheh chnong.
Discussion about this post