Ka HANM Mawsynram Circle da e ko yei kyrchaan wa pura hajrong i rai yong ka Dorbar Chnong Mawsynram wym e NOC ya ki bru niam kiwa kwah wow pynman ya ka Yatra wei wow leh niam ha ka krem Mawjymbuiñ.
Ka seiñ da ong ko wa burom ko ya waroh ki jait niam katkam ka riti synchaar ka ri India tangwa toh u burom leh yei hok man tre thaw kamjooh ki hukum ki adong ka Dorbar Chnong Mawsynram kawa nadooh i por warim kam ka chnong da sumaar wei pait ko ya ka krem Mawjymbuiñ.
Ka chnong Mawsynram da em ko i ngait wa nadooh ki por kiwa nachwa ha katai ka krem da chong da ki Puri Lieh wei ym chah wow leh thala næ pynthut ya kini ki Mawjymbuiñ wa em hapoh Krem.
Da em leh i khana parom na ki tymmen ki san yong ka chnong wa uwi u sahep da dat u da u dieñchdooh ya uwi na kitai ki moo wa em ha saad yong katai ka krem hadooh wa haap u wei da jia iwa sñiawsih ya utai u sahep uwa da yap noh ha luti Mawphlang.
Ki nong Mawsynram nadooh i por warim da ngait ki wa deiwa em katai ka krem da kyrkhu ko ya kiwa chong chnong ka Mawsynram.
Ka seiñ da ong ko leh wa i wan lehniam kiwa pyndep ya ka Yatra ha ki snem wa dadep da pynthut ko chiboon yei wan kiwa uiñke suwari wei ya kiwa wan thooh bniah (Research) yei long i man kani ka krem.
Chooh chooh da ong wa i awri, i boon bru wa i noh khiar yei tngit da pynjakhlia ko ya ki thaw wa em chajan kani ka krem wei i leh kini kiwa pynman Yatra da tyngkheiñ ko ya ki adong wa da booh wei pynyieñ ha ki Signboard yong ka chnong.
Kamtæ ka HANM Mawsynram Circle da e ko yei kyrchaan wa pura ya ka chnong Mawsynram wa lada em kiwon kiwon ki kynhun niam næ kiwi won wa thmu wow leh yabor næ knieh yabor yei hok mantre ka chnong Mawsynram ya katai ka krem Mawjymbuiñ, ka seiñ u emlang ko wa ka chnong.
Discussion about this post