Ynne ka sngi kawa man ka Dorbar Tlang ka JHADC, neiliang uwa yahkhmat ya ka Liang Pyrchah u Andrew Shullai da wanrah u ya ka mat yaklam namo ka Motion heiyatoh wei wow pynkreh hok ya ka Jaiñtia Hills Autonomous District Council Service Rules, 1981 neibynta kiwa kreh ka Council.
Da ong u wa ya kani ka aiñ da pynkreh chibhah donhi deiwa e nongmuna wa heipor wa pynman yakhih kiwa kreh ka Council neibynta ka tulop da yoh Showcause ki.
Da kdaw u wa katkam ki kyndon ka Service Rules da klam che wa kiwa kreh ymhoi u embynta ki ha ki yalang ki Political Party tangwa em won kiwa kreh kiwa lai cha ki yalang ki party kiwa chong hajrong stage wa ki labon ha radang wei ya kam kini kiwa kreh ym em u chah pynchitom ki.
Hajrong kani ka mat kiwi ki MDC kam u Jamshaphrang Pohtam, u Daemi Liam wa u MB Rymbai da klam ki wow kyrchaan ya ka heiwa da kdaw wa em kiwa kreh wot hadooh ya ki MDC leh ym tipmit ki, em kiwa dih duma sarong hakhmat ki MDC, em won leh kiwa chong dap chynrang dap kynthai dei sñiaw khaaiñ hajrong stage hawa man yalang ki party.
Hajrong kani ka mat neiliang u CEM, u Thombor Shiwat da kubur u wa em kam kitæ kiwa kreh ha ka Council kiwa khlai tdem pum wot hakhmat yong oo.
Da khana u leh wa neiliang ka Executive Committee da pynkhreh ko leh ya ka Service Rules wa thymme kawa man katkam ka juk wa katni ya ka wow wanrah ha ka Dorbar Mang Tangka ha u 2027 heiwa kam kitæ kiyi kiyi waroh ym jia de ki.





Discussion about this post