Da sih wot u sarok Jowai Bypass

Ka seiñ HANM West Jaiñtia Hills da beiñ joor wei pynsñiaw ko yei sñiawsih yei tlot ki bor sorkar neibhah u sarok Jowai Bypass da sih wot u.

Katkam ka RTI wa da yoh ka seiñ, ya uni u sarok da mang poisa hadooh Rs. 13.95 klur tangwa du hadien kattu katni bnai wa dep u pynchna, da sih wot u deiwa mih ki thlu ha tymbud uni u sarok neidaw wym biang i kreh katkam wa toh u leh ya uni u sarok da u Contractor iwa da wanrah yei eh wa khroo ya kiwa lai wa wan na uni u sarok.

Neiliang ka seiñ da dawa ko wa toh u pynchna smat mar ya kut u slap wei lada ki bor sorkar wa toh u pait yeini ym bna ki, neiliang ka seiñ ym yohsa ko wow chim da kiwi ki laad ki luti yow suk ki paidbah.