Da ka yakob pynyoo yei sap pynman ka Loompyrdi Iongpiah Upper Primary School kam chibynta i lehkmen dap 25 snem

Ka Loompyrdi Iongpiah Upper Primary School, Jowai kam chibynta wow pteiñ yei lehkmen dap 25 snem i lai luti ka skur hei wow e i tip i stat lyngba i puræ puthi iwa da sdang nadooh ka 09-04-24, ynne ka sngi won da pynman ko da ka rynsan yakob yow pynyoo sap ki khynnah skur wa tip kam ka Literary and Arts & Culture Competition heiwa da wan wow wai da u Awhai Andrew Shullai, MDC Jowai Central kam u kongsan hei emlang u Saron Paswet MDC, Jowai South kam u symbood kongsan, ki waheh wasian ka chong Loompyrdi Ïongpiah, ki bei ki pa ki khynnah skur, kiwa sikai ki khynnah skur wa kiwi.

Ha ka yalang wa pynlai da u Ribait Pde, da yoh i ngooh Blai na ka Really Rymbai, Assistant Teacher, i rwai ki khynnah skur Loompyrdi Iongpiah ya ka School Anthem wa i klam pynkynmoo yei lai luti kani ka skur na u C.Tympanglang Laloo.

U Saron Paswet hawa klam kam u symbood kongsan da ong u ki 25 tylli ki snem wa da lai wym toh iwa suk ya ki bor pynlai kamjooh kiwa sikai wow jop hadooh kani ka kynti, neibhah iwon iwon wa sdang man iwa eh wei hap leh u sdang chwa neiwa khian.

Kamtæ i ye kani ka skur u ku u roi toh wa maya kiwa chong chnong ka Loompyrdi Iongpiah deiwa pynlai skur leh ya ki khon ha kani hi ka skur, kamwa da chimkhia lang nadooh ki waheh wasian wa yahkhmat.

Neitæ hawa pynchlur u ya ki manbei manpa wow phah puræ ya ki khon ha kani ka skur, da pynkynmoo u leh ya ki khynnah wow ksoh ya ki kyrdan em burom kiwa mih na kani ka skur, deiwa pynrap wa man hi ka skur wa biang ya ki khynnah u puræ.

U Andrew Shullai won hawa klam, da ong u khlem i kreh chitom ym ye u poi hadooh kani ka kyrdan neibhah wym toh iwa suk u pynlai ya ka skur hanlada yoh yarap na ka sorkar leh.

Yooluti u wa dei kreh chitom wa i rai kut, u nang ye chooh chooh u lai chaphrang najrong wa e u leh i pyn-eh-daw pyn-eh-nasib.

Tæ kamwa ki bei ki pa ha ka juk katni yaleh ki u thooh laad yabeh yow pynyoh i stat i tip neibynta ki khon cha ki skur waphær waphær, booh u leh i kyntu ya ki bei ki wa kiwa sikai wow hikai haroh ki ya ki khon, ki khynnah wow man kiwa tip u im hei akor wa bha wa miat, wei wow man leh kiwa em i kitkhlieh haka imlang sahlang, u em i kitkhlieh neibynta ka ram-aw wa kiwi.

Ya kani ka lehkmen dap 25 snem i lai luti ka skur Loompyrdi Iongpiah Upper Primary School Jowai daw pynkut won ya ka ha u Thohlakhmi (Feb) 2025 hapoh i pait i pynlai ka Organising Committee Silver Jubilee.