Ka NEHU Deen Dayal Upadhyay Community College for Skill Development, Wahiajer da pynman ko ya ka e sikai neibynta kiwa tem wa put (Musical Troupe) yow pynbha yei sap yong ki kawa da sdang nadooh ka 13 tarik hadooh ka 17 tarik uni u bnai heiwa da wan wow chimbynta da ki spah ngut ki khon khynroo kynthai wa chynrang kiwa bang yei rwai i siaw wa ka tem ka put.
Ya kani ka e sikai da wan wow wai da u Prof. H. Lamin (Rtd) Founder, Princial I/c, wei ha ka sngi pynkut da wan da u Prof. P.S. Shukla, Vice Chancellor, NEHU chirup i emlang ka Prof. S.M. Sungoh, Principal I/c, u Prasenjit Mishra kam uwa e sikai, u Andriew Sari, Secretary ka chnong Wahiajer chirup wa kiwi tawon kiwa da chah khut sñiawbha cha kani ka yalang.
U Vice Chancellor hawa e yei klam da yaroh u ya ka Prof. S.M. Sungoh kawa man kam ka Principal wa da ye ko u pynman ya kam kini ki jait e sikai waphær waphær man-u-bnai yow yoh myntoi ki khynroo khyllood ka thaaiñ.
Da ong u leh wa angnood u wow wanrah kam kini ki e sikai (Skill Training) khnang yow pynbha chooh chooh yei sap wa em ki khynroo khyllood khnang yow ye ki u yieñ ha ki kjat yong ki khamtam cha ki thaaiñ palatsor ka Ri Jaiñtia.
Chooh chooh da ong u wa ka NEHU toh kawa kwah wow kyntu kynrong ya kiwa em yei sap yow yoh ki ka thaw wow sai yeiwa em hapoh yong ki yow ye ki u pynpliah pynbha pynmiat yeiwa da ye ki u leh katni khamtam ha ka tem ka put.
Da ong u wa ki khynroo khyllood emkaam wow wai luti ya ki wei kam kani ka e sikai daw yarap bha yow tip ki leh chaphang kiwi ki jait tem jait put wa ki rukom rwai yong kiwi yow ye ki wow yoh kiwa boon ki bru wow ka’it yeiwa pynmih ki.
Da pynwai ya kani ka e sikai da ki kyntien khublei na u Wolnish Rymbai uwa man kam u College Programme Co-ordinator ka DDUCC, wei da saam leh ya ki Certificate cha waroh kiwa chimbynta.
Discussion about this post