Da ki hajar wa wan e khublei khaddooh ya u Tbn HB Dan

Ynne ka 18 tarik da pyndep ya ka niam wa khaddooh yong u Tbn HB Dan ha loom tlep-bru yong ka Balang Presbyterian Jowai heiwa da emlang kiwa ha-yung ha-sem, ki kur ki jait, ki khon ki ksu, ki Pastor, ki Tymmen Wasan, ki Secretary Balang, ki dkhot yong ka JHADC wa ki hajar ngut kiwa chong chnong na kylleiñ ka Ri-loom Khasi Jaiñtia.

Chwa wow lai pyndep ya ka niam tlep wa khaddooh da em ka yaseiñ ha yung sah i yong oo iwa em ha Dulong, Jowai wa ha Yungmane ka Balang Presbyterian, Jowai ha Mission Compound.

U Secretary ka Balang Presbyterian Nongjngi hawa khana yei parom wa tbian, da ong u wa u Tbn HB Dan da man u u bru uwa smat wow kit wow bah yei kaam yong ka Balang hi waroh kawi.

Da ong u wa heipor wa dang man u kam u khynroo da sñiaw toh u wow man kam u dkhot wa pura yong ka Balang wei da jooh ksoh u leh yei kaam Balang waphær waphær heiwa ha u snem 1990 ka Balang Presbyterian Nongjngi da jied ko ya oo wow man u kam u Tymmen Wasan wei da man u leh kam uwa kitkaam lane u dkhot nadooh ka District, Presbytery, Synod kamjooh ka Assembly.

U HB Dan da jooh sikai u leh ha Upper Primary School Nongjngi wei kam uwi na ki muktiar hapoh ka Office u Deputy Commissioner wa ka JHADC.

Da psiah u cha ka kaam Politics wei da man u kam u MLA 3 sien heiwa da man u leh kam u Minister wei kam u MDC 2 sien wei da ksoh u ya ka chuki CEM 3 sien.

U Madonbai Rymbai, CEM warim yong ka JHADC hawa e yei klam da ong u wa uni u rangbah da man u kam u MLA la 3 sien, ha u snem 1978 na ka JNU, 1988 na ka Congress wa ha u 1998 na ka UDP.

Da ong u leh u wa uni u rangbah da dooh u 2 tylli ki Post kitæ toh u Chief Minister yong ka jylla wa kam u Governor ha kiwi ki jylla ka ri.

Da e u leh yei kyrkhu kyrdoh ya ki khon ki kti, kiwa ha-yung ha-sem waroh kawi wei kamjooh leh ya uni u rangbah wow lai u chakhmat u Blai dei suk dei saiñ wei wow kyrkhu kyrdoh u yow nang mih chooh chooh ki bru na ka yung ka sem wa na ka ri Jaiñtia hi waroh kawi wow bood yei dienkjat yong oo.

Neiliang kiwa ha-yung ha-sem da e ki yei sñiawngooh ya ka Balang wa da chah ki wow lai tlep yei metyap ha u loom tlep-bru yong ka Balang Presbyterian Jowai.

Da kyrpaad ki leh ya ka Balang, ka Presbytery wa ya ka District hi waroh kawi wow emlang ki wa ki khamtam hei duwai.