Hadien wa uwi u sarok khyndaw wa em ha khap ka Iawthymme wa man tre da ka JHADC wa ha khap ka Yaaw CNI ha Ladthadlaboh Jowai da chah kset wei dap jhep u hadooh wym lait kari de wow lai neidaw wa noh jhep kulmar ki bru, neiliang ka Dorbar Chnong Ladthadlaboh da pyntip ko cha ka Jowai Municipal Board, wei ynne ka sngi chirup i sakhi lang ki waheh chnong waphær waphær ka Ladthadlaboh Pyllun hei yahkhmat u Aiban Shullai, Waheh Chnong Ladthadlaboh, u Philanderwell Lyngdoh, Chairman ka Jowai Municipal Board, u C.S. Mannar, Special Officer In-charge Market JHADC, u Rev. G.S. Shullai In-Charge CNI Market wa kiwi, da pynkhooid noh ya ini i jhep da ka Jowai Municipal Board.
I neh ini i jhep khlem da khat da chah ktah leh ki bru wa chong dukan chong yung chajan.
U Waheh Chnong ka Ladthadlaboh ong u wa kani ka thaw da man i bahkhlieh da warohlang nadooh kiwa chong yaaw, kiwa lai yaaw lai haat kamjooh kiwa chong wa sah ha kiwi ki thaw neibhah em kiwa wan nohjhep ha ini i thaw. Kamtæ da maham u ya kiwa dang wan noh jhep hadien wa dep pynkhooid.
Heiyatoh wa uni sarok leh ong u wa dadep e dei thoh cha ka chnong wa cha u MLA, wei kamwa da kular u, yooluti ki wow smat pynkreh noh oo khnang yow man u sarok wa miat, wei ki paidbah leh u lait ki u noh jhep oo.
Neiliang u Chairman ka Jowai Municipal Board kyntu u wow man ki bru wa em i kitkhlieh wym toh u noh khiar yei jhep khnang yow lait nei sma i tung wei chah ktah i chait i khiah, kamjooh ki umbaam umdih, deiwa yang hadooh wa wan ka kari kit jhep ka Municipal hi.
Heijooh i por maham u leh ya ki bru wa chim kabu kit jhep na ki thlu yung deiwa paan poisa wei li noh kulmar kat chawa em. Da tyrwa u leh wow e da nong ya kiwon kiwon ki bru wa bien u chondur wei pyntip cha ka Municipal ya ki kari wa noh jhep kulmar.
U Rev. G.S. Shullai In-charge CNI Market, pyntip u wa heiyatoh wa i jhep wa mih na kini dukan da em hi ka thaw wa kit pyllang ki ya kini ki jhep.
Neiliang u C.S Mannar, Special Officer In-charge Market JHADC leh pyntip u wa kam ka Council pyndep bait ko yei kaamram wow kit yei jhep napoh ka Iawthymme nei thaw wa da pyllang, tangwa i joor boon i jhep wa poi ha Iawthymme ong u wa toh kiwa wan noh ki bru na kylleiñ, ym du yong kiwa chong yaaw.
Discussion about this post