Ka sorkar pyrdi da phah ko ya ka sorkar jylla wow pynuiñ noh ya ka poisa kawa palat Rs. 200 klur lada ym ye ko wow pynbait noh smat yei kaam thied thaw neibynta wow pynkrehkaam chna luti rel ha Khasi Hills.
Hawa pyntip yeini, neiliang u Montri Rangbah, u Conrad K Sangma da ong u, “Nga dadep yachem O wa u Montri ka chnat Railway uwa da pynsñiaw yei sñiawkhia hajrong kani ka luti rel ha Byrnihat wa ha Shillong leh. Wei nga dadep O wow klam chwa ha oo ha ka yalang wa i emkaam i wow chim lang yei mynjur yong kiwa boon ki liang wei khlem da ye wow leh yeini ym man ko kawa yahaap ya i wow leh dei bor ya kani ka kaam. Nga da ban joor oo wow chimlang yei mynjur yong waroh chwa wow chim yei rai kawa heh kam kani”.
Kam wow pynkynmoo wa ka sorkar pyrdi da tyrwa ko ya artylli ki kreh ha ka jylla kattæ ka Tetelia-Byrnihat kawa 22 km waka Byrnihat-Shillong kawa 108 Km.
Ya ka Tetelia-Byrnihat da mang wow pynkreh ha ka mang poisa wa Rs. 496 klur. Tangwa kini ki kreh da tyngkhooh ki yei pyrchah ki paidbah wa na ki seiñ waphær waphær kiwa da sñiawkhia yei wan psiah ki baar jylla.
U Conrad da pyntip u wa, “U Montri da pynsñiaw u leh wa daw thoh u da ka chithi cha nga wa lada ym ye wow pynbait yeini i kaam hapoh 3-6 bnai, ka poisa wa Rs. 200 klur kawa da e wow thied thaw kawa da em wa u DC nadooh u nem 2017, daw hap wow pynuiñ noh. Wei kawa rap kongsan toh wa kani ka kaam daw chah pyndooh noh wei ka sorkar daw pynkreh noh ko cha kiwi ki jylla lada kwah ki ya ini”.
“Nga da kyrpaad O ya u Montri wow e por ya i wow yaklam tangwa i e por toh iwa rap khim bha. Ym em da yaklam tikna ya ki bnai tangwa da ong u wa ha ki kajiak bnai daw thoh u cha nga wei lada emkaam daw wan u da oo wow chong yalang wa ki seiñ waphær waphær wow yaklam yeiwa kongsan ini i kaam wei daw pait kammon kani ka kaam u lai ko,” da pyntip u Conrad.
Discussion about this post