Neidaw wa ka Election MDC cha ka JHADC wa KHADC ha uni u snem daw ya tyngkhooh ko wa i por yaleh Exam SSLC wa HSSLC yong ki khynnah skur, kamtæ u Khroo Lamsalanki Pariat uwa da pynbna wow yahun MDC kam u kyrtong samen na Jowai North Constituency, ynne ka sngi da e buit e yumut u ya kiwa yahkhmat ki chnong waphær waphær wow sñiawbha ki pynman da ka Common Platform namo ka rynsan yalap Election deiwa wanlang ki kyrtong du haka jooh ka rynsan neibynta waroh ki kyrtong MDC wei wow khang leh i wan ki paidbah kiwa na baar.
I daw wa mih u chakhmat wow tyrwa yeini toh neidaw wa da boon ki manbei wa em ki khon ki kti wa daw yakhun Exam da li ood li naam ki cha oo wei kyntu ki leh ya oo wow pynsñiaw u cha ki waheh chnong ka Ri-loom Jaiñtia khamtam ha Jowai kawa em ya ki Center thoh Exam.
Deiwa leh kamni ong u daw yarap pynduna ko yei por kiwa chong chnong neibhah wa hap pynlut por ki du chisien donhi wow lai ap ya ki yurim yaleh Election yong waroh ki kyrtong, wei ym pynthut i leh yaki khynnah skur wa pynkreh Exam SSLC wa HSSLC, najrong wa wanrah ko leh yei khooid i suba haki chnong ki thaw.
Heiyatoh wa ini i e yumut, u K.L. Pariat da e u dei thoh haroh cha ki waheh chnong waphær waphær.
Chooh chooh ong u, chibynta kani man ko leh yow yarap u pynbait yaki Election wa da lai, heiwa nachwa ha ka jooh ka chnong na kawi ka sngi cha kawi won wan yalap Election ki kyrtong ha deilang i yah paidbah na baar, wei deiwa leh kamni da jooh yoo wa najrong wa wanrah yei tngit ktah ko leh yei chongsuk chongsaaiñ haka chnong ka thaw.
Neitæ kyntu haroh u wow pyndooh pyndam yei tem sur miet kamjooh i yachaad.
“Lada ym leh kamwa e yumutlang uwa boon wa lang wow em du kawi donhi ka rynsan, yoo O wa em i maa, wa manda yoh laitlan wow ya lai paidbah daw psiah leh sei sih wa boonjait wa kynthup nadooh ka poisa wa i dih pynmuaid wa boonjait,” da ong u K.L. Pariat.
Kamtæ kyntu wei kyrpaad joor u yaki waheh chnong wow yakrehlang wa ini i e yumut u kawa da wan ym du ka sur yong oo samen, tang kawa wan leh na kiwa boon ki manbei.
Discussion about this post