Ka Supreme Court ka ri India da khyrwait ko ya ka sorkar Assam yei wym phah liwan ki ya ki bru wa dadep ki wow pynbna kam ki baar ri deiwa ong ileh yang phi yei por wa man “Muhurat” namo i por wa man kyntang.
Ka miej bichaar u Justice Abhay S Oka wa u Justice Ujjal Bhuyan da kylli ki ya ka sorkar Assam chaphang ki 63 ngut ki bru wa da kset ki ha ki Detention Centre hadien wa dadep takit wei da chem toh ki baar ri wei hawa dep leh ya ka National Register of Citizens (NRC).
Neiliang ka Assam da e daw ko wym tip ko neiwon i chnong kini ki bru ha ka ri wa wan ki tangwa ka yung bichaar ym em hun ko yeini wa da jubab.
U Justice Oka da ong u wa ka Assam da murieh ko yeiwa tip ko heiwa da jubab u Solicitor General of India, u Tushar Mehta wa dadep yaklam u ya ki heh dooh ka sorkar wei da paan maap u yeiwa em i duna heini heitai.
U Justice Oka da maham u wow e da ka Perjury Notice deiwa ong wa ka sorkar toh u khana ko dei hok heiwa u muktiar ka Assam da ong u wym em murieh iyi iyi tangwa u Justice Oka ym ngait u yeini deiwa ong wa em hi wa murieh ki lym kamtæ ileh ym khana yei daw wa kini ki bru toh kiwa na baar ri.
U Justice Bhuyan da ong u wa chisien wa da pynbna wa u bru toh u baar ri hap wow leh yeiwa emkaam neibhah ym ye wow kset hi-eh ki khlem da booh por deiwa kylli wa la katwon ngut kini ki baar ri da phah liwan ki.
Da ong leh wa ym emkaam u tip yei chnong tre ki neibhah lada toh kiwa na Pakistan waroh tip ki ya ka nongbah ka Pakistan wei toh u lai booh ki cha katæ ka nongbah neibhah ym ye u kset du neidaw wym tip heiwon i chong tre ki.
Ka yung bichaar da ong ko wa ki baar ri toh u phah liwan ki khlem da pynslem neibhah ka ri wa wan ki em i bahkhlieh wow thooh yei chnong tre ki. U Justice Oka da kylli u leh wa iyi i daw wa ka Assam ym thoh ko cha ka Ministry of External Affairs yow paan yarap.
Discussion about this post