Ynne ka sngi ka Loompyrdi Iongpiah Upper Primary School, Jowai da pynhaap pyrda ko yei lehkmen dap 25 snem ka skur ha ka yalang wa da pynman ha Myngkoi Pyrdi, Loompyrdi heiwa u MLA ka Jowai, u Wailadmiki Shylla da man u kam u kongsan katwa ka Jt. Director of School Education, ka P. Syiem kam ka Symbood Kongsan.
Ya kani ka skur da sdang nadooh ka 26 tarik u Thohlakhmi (Feb) u snem 2000 wei katni em ko nadooh Class Tiny Tots hadooh Class VIII wei da pynman ya ka skur ha yung yong ka Yungwalieh ka chnong.
Ha kani ka sngi pynhaap pyrda da yoh i kyntien pdiang burom na u C. Tympang Laloo wa i kyntien ngoohblai na u Wansalan E. Dhar.
Kam ka Symbood Kongsan, ka AP Syiem da ong ko wa ka skur da kynjoh ko cha u moomer wa 25 snem wow chakri ya ka imlang sahlang ha i stat i tip wa i puræ puthi deiwa yaroh ya kiwa embynta wow sdang ya kani ka skur.
Da ong ko wa ini i lyngkhooh snem man i wow kynmoo ya ki por wa da lai kamjooh wow pyrkhat ya ka mynried ka skur deiwa kynmoo ya ka thong wa da sdang ya ka skur kiwa booh ya ka thong haphrang yong ki.
Chooh chooh da ong ko wa i lehkmen man i i por wow pyrkhat yillu heiyatoh wa kammon u pynjanai ya i puræ puthi neibynta ki khynnah ka skur deiwa ong leh wa man ko kawa kmen wow embynta ha ini i lehkmen deiwa kynmoo leh ya i chakri kiwa sikai kamjooh ki dkhot ka SMC.
U Wailadmiki Shylla da ong u wa kani man ko ka sngi wa kyrpang ka wow sahkynmoo ya ki 25 tylli ki snem wa chakri ka skur ya ki paidbah deiwa e khublei ya ka chnat puræ puthi neibhah wa da man ka West Jaiñtia Hills kawi na kiwa da ku bha ha i stat i tip.
Da ong u wa sñiaw u kamwa da lait ram neibhah ha u snem wa dadep neiliang ka skur da khut wow wan wai paidbah ya i lehkmen dap snem ka skur tangwa ynne da kmen u wa da yoh u wow wan chimbynta.
Chooh chooh da ong u wa hanla chimpor hadooh le kynta kani ka yalang ynne, tangwa emkaam u kynmoo yei lai luti ka skur wa 25 snem kattu wei emkaam u e khublei ya kiwa sikai wa kiwa pynlai de ya ka skur.
Da e khublei u ya ka Loompyrdi Iongpiah wa da chim ka lyngkor wow e ya i puræ puthi cha ki khynnah wei emkaam u pyrkhat kammon wow pynku ya ka skur ha ki por wow wan.
Heiyatoh wa i thmu wow pynheh ya ka skur cha chnong Chyrmang, da yaroh bha u deiwa ong wa ka sorkar ymye ko wow sdang ya ki skur ha kylleiñ tangwa pynchlur ya kiwi wow sdang skur ki khnang wow ye u pyndap yeiwa duna ha i puræ puthi.
Da yooluti u leh wa deiwa sdang ya ka Secondary School cha Chyrmang daw ye bha u pyndap yei puræ purthi ha kylleiñ.
Heiyatoh wa man u kam uwa mihkhmat da ong u wa da pyrchang wow yaklam wa ka sorkar wow rah sa kawi ka College ha Ri-loom Jaiñtia heiwa ha kani ka kynti ka sorkar da pynlait ko sa kawi ka Government College ha East Jaiñtia iwa daw ye u pynduna ya i lyngkor ka Kiang Nangbah Government College deiwa kdaw leh ya ki kattu katni ki College kiwa da yoh yarap na ka Community College Scheme ka sorkar jylla.
Da ong u wa hapoh ka jylla em 30 lak ngut kiwa chong chnong katwa ki skur won waroh em ki du 15,000 tylli donhi, wei hawa pait ya i psiah ki khynnah namo ka Enrollment man ko du 15-20 ngut kawi ka skur kamtæ ka sorkar da rai ko wow e burom ya ki skur wa lehbha ha ki Exam wa yakhun ki khynnah.
Kiwi kiwa da klam ha kani ka sngi kynthup ki ya u Hercules Toi kam uwi na ki dkhot wa sdang ya ka skur, ka Headmistress, ka Neetu Shullai, u RL Bimee Suwer kam u Waheh Chnong heiwa da khana ki ya ka parom ka skur wei ka luti wa da lai ko hadooh wa poi ynne ka sngi wot hapyrdi ki moochynthut wa boon.
Da pynkup burom leh ya ki Chairman, Secretary wa kiwi ki dkhot kiwa da chakri ha ka SMC ka skur nadooh wa sdang ya ka hadooh kini ki sngi wa katni.
Ya kani ka lehkmen da pynphooh ya ka da ki Drill, ki chaad, heiwa da pynlait ya ka thup sahkynmoo namo ka Souvenir wei da pynlait ya ki tiar sahkynmoo yong kani ka lehkmen.
Hawa khaddooh da yoh ki kyntien khublei na u CA Ram Kyndiah uwa man u Secretary ka SMC-LPIUS.
Discussion about this post