Ka 29 tarik uni u bnai da man ko ka sngi u neh parom ya ki khon ka chnong Dkhiah West, East Jaiñtia Hills wa da yoh ki u kaap kjat chadooh u Lumlapaiar Mopdang Kairang kawa em kawi ka nan kawa pyrtuid ka ‘Kylla Ynñiaw Yung’ hajrong u Lumlapaiar Mopdang Kairang.
Da ya wan wow chimbynta da ki waheh chynrang wa kynthai deilang ki khynnah kiwa dapoi waroh 85 ngut kiwa na Dkhiah West wa kattu katni ngut ki khynnah kam na chnong Moolang wa Iapmala.
Ya kani ka lai kjat da pynman da ka Trekking & Adventure Enthusiast Dkhiah West wei da man ko ka sien ynru wa da pynman kam kani ka lai Trekking cha ki thaw yong rim kamjooh ki thaw wa em ki parom yong rim.
Yeini i lai Trekking da sdang nyngkong ha u snem 2017 wei ha uni u snem chwa u sdang da yoh ki kyntien maitphang na u Dr. Phawa chaphang i thmu kani ka lai kjat deiwa pynsñiaw u leh yei burom wei sñiawngooh ya ki waheh ka chnong wa ya embynta ki u yahluti wot ha i rta wa da heh da tymmen kam u Wh. Muni Swer, u Wh. Jiren Swer wa u Wh. Kidras Sympli wei da yoh i sneiñ i kyntu wa i duwai na u Wh. Keyboy Phawa.
Da pdiang sñiawbha ya waroh kiwa chimbynta da u waheh chnong ka Kairang wei da yahluti da u Kampher Rymbai uwa man leh kam u Resource Person.
Ka nan Kylla Ynñiaw Yung toh kawa em hajrong u Lumlapaiar Mopdang wei heipor warim da em 7 tylli ki manyung wa chong chnong hajrong utæ u loom.
Ka parom kawa da yoh, da ong ko wa wym jooh em i jia wa phylla ha katæ ka chnong Ynñiaw Yung wa cha kiwi won ki chnong wa marjan heiwa cha kiwi ki chnong jooh jia iwa sñiawsih kam ka yap ka kjut, tangwa heitæ i chnong wym jooh jia.
Kitæ ki Yñiaw Yung da phylla ki wa ileh kamni ha chnong yong ki wym jooh em wa yap næ kjut, kamtæ da ya rai chnong ki wow leh ki dei yi re dei yi yow lait u man kamwa man wa jia cha kiwi ki chnong. Ka parom ong ko kamtæ donhi tæ kylla syndet syndet utæ u loom wa chong yung chong chnong ki tæ wiar jait wiar khong ki tæ man thwai man nan deiwa mih da ka um hajrong loom wei na ini i daw da khut noh ya kani ka thaw kam ka Kylla Ynñiaw Yung.
Ya ka parom wa bniah ki waheh ka chnong Kairang wa ye bha u batai.
Da pynkut ya ka kaap kjat da i baam ja sñiawbha.
Discussion about this post