Ka Dorbar Chnong Chutwakhu, Jowai kam chi bynta wow pteiñ yei lehkmen dap 100 snem yong ka, ynne ka sngi da pynman ko dei pynsñiawthooh hajrong i khooid i jngiar kamjooh leh hei yatoh wa i stat ka juk katni namo Technology, yeiwa da pynman ha Chutwakhu Indoor Sports Hall Cum Auditorium.
Ha kani ka yalang pynsñiawthooh da wan wow chimbynta da ki khynnah, kiwa sikai yong ki skur waphær waphær ka sor Jowai.
Ki ar ngut ki bru chemphang wa da e i batai pynche hajrong kini ki phang kynthup ki ya u Emida oo Paya Sumer uwa man u Asst Professor ka Department Environment Science ha St. Edmund’s College, Shillong wa u E.T. Chullai uwa man kam u Senior Research Scholar ka NITM wei u Former Asst. Professor ka Department of Aeronautical ha HITS-Chennai.
U Emida oo Paya Sumer hawa batai hajrong i khooid i jngiar ka mariang da ong u, i khooid ki soodong sookun wan i nei thij i pyrkhat wa ki kaam wa leh i, wei toh u man kiwa sñiawthooh wei wow pynyoo leh ki kaam neibynta i bha i miat yonglang.
U E.T. Chullai won hawa e i batai pynche heiyatoh wa ka Technology da ong u wa kani ka phang toh kawa yarap u pynsuk yei rukom im ki bru neipor cheipor, wei kylla ko kat dang lai i por.
Neitæ hadien da pynyoo nongmuna u leh yei yaphær i rukom im ki bru kamjooh leh ki tiar wa da pynemkaam kajiak snem nachwa wei kiwa pynemkaam katni, heiwa da ong u wa hawa kut hi, chong ha ki bru heiwon i dur u pynemkam ki yaka juk Technology lada hei rukom wow yarap ya ki namo u pynemkaam ha ki luti wa sih.
Discussion about this post