Kam chibynta wow pynchlur ya ki khon khynroo kamjooh kiwa em sap hei yalehke Sports, da wai ya ka madan Futsal ha chnong Sohkymphor, East Jaiñtia Hills kawa da chna da ka poisa wa yoh na ka District Mineral Foundation (DMF) Fund wei da wan wai ya ka da u Montri sorkar, u Kyrmen Shylla ynnin ka sngi.
U Kyrmen hawa e yei klam da ong uwa ha kini ki sngi da em boon ki kaam wa sih hapoh ka imlang sahlang heiwa ki khon khynroo yong i da ngat ki ha kam kini wei ka Sports toh kawa ye wow pynlait na kini ki kaam, kamtæ i wai ya kani ka madan man ko kawi na ki laad deiwa pynrap u leh wa dang emkaam chooh chooh wow wai ya kiwi ki thaw yalehke yow pynpliah yei sap ki khynnah.
Da e nongmuna u ya ka Artificial Turf Football Ground wa em ha Dieñchynrum kawa da em boon bha kiwa da pynemkaam ka wei da yooluti u wa deiwa em kani ka mandan Futsal ha Sohkymphor daw pynmih ko ya ki khloor yalehke kamjooh kiwa em yei sap yow nang ye chooh chooh ki wow ku chaneiñ.
Da pyntip u leh wa daw chna chooh chooh kam kini ki madan Futsal lyngba ka DMF yow yoh myntoi ki khon khynroo ka District.
Neiliang u Deputy Commissioner ka East Jaiñtia Hills District, u Shivansh Awasthi da ban joor u yei emkaam wow syndong ya kani ka madan deiwa ong wa emkaam wow booh bhah ka poisa wa pynmih na kani ka madan yow pynchna yeiwa sih wa jæd ko yow man ko kawa daw neh slem.
Da emlang leh ha kani ka sngi wa u Deputy CEM ka Jaiñtia Hills Autonomous District Council (JHADC), u Lasky Rymbai, u Deputy Chairman ka JHADC, u Wailadameshwa Siangshai, ki waheh chnong, ki khynnah wa kiwa sikai skur kani ka thaaiñ.
Discussion about this post