Ka seiñ Khasi Jaiñtia Youth & Students Union (KJYSU) lyngba ka kyrwoh wa phah da u Chemi Phawa kam u President, da kyntu u ya ka sorkar MDA-2 wa yahkhmat da ka NPP wow pyndooh pyndam noh chisiendon yei biah yit rong yong ha ki kari paidbah.
Ka seiñ da ong ko wa da em ka hukum da ka Supreme Court wym chah de wow biah pynyong ya ki yit kari paidbah neidaw wa ini da e laad ko ya chiboon ki kaam pyrchah aiñ wa ki kaam wa sih.
Tangwa katkam wa chem ka seiñ, kattæ da em boon ki kari wa biah yit yong khamtam kitu ki kari wa syad dor wei ya kam kini ki kari ki bor yong ka aiñ ym em pynkhor ki næ leh ki iyi iyi katwa ki kari toh dor won da chah pynrkhiñ bha ki.
Kamtæ ka seiñ da kylli ko wa lada ki kaam wa sih hoi hi u leh hapoh ki kari syad dor katwa hapoh ki kari wa toh dor won ym hoi mo?
Wei ini i rukom leh da pynyoo ko yei leh chiliang wa i leh ar sap, wei mut i leh wa kiwa mahajon ye ki u leh katwa ngait wei ym em wa ye u tba ya ki katwa ya kiwa khian wa nai won da yooh da kyrtem ya ki iwa mut wym leh kreh salonsar ka aiñ.
Hajrong ini waroh, ka seiñ da kyntu ko ya ka sorkar deilang ki bor ka aiñ wow chimkhia ki wow khang noh ya ini wei toh u chah du ya kitu donhi kiwa da yoh bor katkam ka aiñ wow leh yeini.
Discussion about this post