Ka Jaiñtia National Council (JNC) ynne ka sngi da lai ko wow tuklar yei chah pyndooh kreh ki 9 ngut ki Home Guards kiwa da kreh la kamwa 10-15 snem hapoh ka yung krehkaam ka Powergrid wa em ha Khliehriat.
Neiliang ka seiñ da lai yachem ko wa u Chief Manager ka Powergrid uwa tip kam u Sanatanu Das wei hawa yaklam wa oo da pyntip u wa i pyndooh kreh ya kini ki Home Guards toh nei yoh hukum na ka sorkar jylla wa ya kitai ki 9 ngut da hap wow pyndam noh neidaw wa daw thung da kiwi kiwa na ki Agency kiwa em hapoh ka sorkar pyrdi.
U President ka JNC, u Sambormi Lyngdoh da beiñ joor u yeini i leh ka sorkar jylla neibhah ini da pynyoo che ko wa ka sorkar jylla ym burom de ko ya ka chnat Civil Defense & Home Guards ka jylla deiwa kylli leh wa lada ka sorkar jylla hi dang chaniah bru ko da kiwa na baar næ kitæ ki Agency wa na baar ka jylla wei lada kamtæ iyi i myntoi wa ka sorkar u booh ko ya kani ka chnat hapoh ka jylla lada dang ye hi ka Agency wa na baar wow leh kamni.
Hawa yaklam wa uni u heh ka Powergrid, da paan por u hadooh ka 5 tarik uni u bnai yow pynbait ya ini i kaam wei ka seiñ da ong ko wa lada ym ye u leh iyi iyi, daw chim da ka laad ka luti wa khor.
Ka seiñ da ong ko leh wa daw lai yachem ko wa u Montri sorkar wa pait ya ini i kaam wym toh u wanrah bru ki na baar wei wow yoobeiñ ya ki tre chnong neibhah ya kini ki kreh toh u thung da ki bru yong i hi.
Discussion about this post