Ka Jaiñtia National Council (JNC) Khliehriat Circle ynne ka sngi hapoh i yahkhmat u Working President, u Diamon Bareh wa u General Secretary, u Symboh Baiar Sumer da yoh ki wow ksoh ya ki ar ngut ki khynroo kiwa da ngat hei kyrni drugs heipor wa dang dih drugs ki ha kawi ka thaw wa em ha thaaiñ Khliehriat.
Ka seiñ deiwa sñiawkhia da lai ko wow ksoh ya kitai ki ar ngut wei da rah leh ya ki cha yung krehkaam ka seiñ neibynta wow e yei hikai ya ki ha ka luti kawa bha wei wow sneiñ u kyntu leh ya ki wa i drugs toh iwa choon ya ka imlang ka sahlang wei da kyntu leh ya ki wow pyrchang ki wow lai hei luti wa bha wa miat khnang wow ye u lait na uni u jait dih uwa maa tam, neibhah i drugs pynsñiawsih i ym du ya kiwa ha-yung tangwa wanrah ko leh yei boon i eh i khoo khamtam heiliang i chngaaiñ hapoh chnong hapoh thaw wei ye leh u pynkut yei mynsien bru du kattu katni por donhi.
Neiliang ka seiñ da yoh ko leh wow kem chiboon i drugs na kini ki ar ngut wei da thang yeini i drugs waroh chisiendon.
Hadien ini da pyntip cha kiwa ha-yung ki arngut wei da phah leh ya ki wow li thooh noh ya ki. Heipor wa yaklam næ takit ya ki da khana ki wa em boon ngut kiwa dai drugs hapoh ka East Jaiñtia Hills District.
Ka seiñ da pynsñiaw ko yei sñiawsih iwa joor hajrong i yoh laitlan kini kiwa dai drugs wei da kyntu leh ya ki chnat sorkar kiwa toh u pait yeini i kaam wow leh noh ki yeiwa emkaam tam khnang wow ye u pyndooh jait yei drugs. Ka seiñ da ong ko leh wa u yakhun pyrchah ko hadooh wa ye u pyndooh jait ya kini kiwa dai wei u pynngat leh ya ki ha ki kyndon wa khor.
“Ini toh i sdang donhi wei neiliang ka Khliehriat Circle daw boodien chooh chooh ko yeini khnang wa i chongsuk chong saaiñ hapoh ki chnong ki thaw u man ki kiwa chngaaiñ,” da ong ka seiñ.
Ka seiñ da kyrpaad ko leh ya ki bru paidbah wow ya krehlang ki wei u pyntip ki leh lada em kam kini ki jait kaam.
Discussion about this post