Jowai : Ka 3rd Republic Day Cup Under-12 Football Tournament da poi ko cha wa kut ynne ka sngi da ka yalehke Final ha pyrdi ka Mulang Ialong pyrchah ya ka Mukhla Raij wa pynman ha Kiang Nangbah Stadium, Ladthadlaboh.
Ha ka kylla step ka Mulang da yoh u thap kool nyngkong ha ka minit wa 13 lyngba u Charelang Mulieh wei kani ka kool da neh ko hadooh wa kut ka kylla step.
Ha ka kylla miet ka Mukhla Raij da yoh ko u su kylliang ha ka minit wa 38 lyngba u Ahuni Suna wei da thap biang ko sa chi kool ha ka minit wa 47 lyngba u Pyrkhatbha Pale. Ka Mulang Ialong won da su biang ko ha ka minit wa 50 lyngba u Sarbaitki Lhuid. Ka yalehke da kut ko hadooh wa pyndep ya ka Extra Time mar ar kool.
Da rai ya kiwa jop da ka yachut Tie-breaker heiwa da ya chut 9 sien chiliang heiwa ka Mulang Ialong da jop ko 9-8.
Ha kani ka sngi leh da saam leh ya ki naam ‘Top Scorer’ cha u Diangheimonmi Kyndiah yong ka Dulong, ‘Best Goalkeeper’ cha u Leman Shylla yong ka Panaliar, ‘Man of the Match’ Charelang Mulieh yong ka Mulang Ialong wa ya i naam ‘Player of the tournament’ cha u Ahuni Suna yong ka Mukhla Raij.
Discussion about this post