U SP ka East Khasi Hills, u Vivek Syiem ynne da ong u wa dang thooh ya ki chi jur kiwa na Madhya Pradesh, ka Sonam Raghuvanshi wa u Raja Raghuvanshi kiwa da wiar hadien wa wan uiñke ki ha Sohra.
U Vivek da ong u wa da yoo ya ki ha ka 22 tarik uni u bnai heipor wa wan ki da ka Yamaha Cygnus Scooter ha Keating Road, Shillong wei da lai ki cha Mawlakhait neitæ won cha Nongriat heiwa da sah ki ha Shipara Homestay.
Da lai ki cha Nongriat hei step ka 23 tarik heipor kamwa 5:30 wei ye u man dei thmu wow lai cha ki yingkieñ dieñjri wei da liwan biang ki cha Mawlakhait tangwa ym em chem de ya ka Scooty ha Mawlakhait. Da chem ya ka Scooty hajan Golden Pines Dhaba ha Sohra Rim da ki bru paidbah hei miet ka 24 tarik iwa da pynsuba wa ye u jia iyi re iyi ya kini ki bru neibhah da ieh ya kani ka Scooty deiwa rap slem.
Ya ka Scooty wa u chabi da e kti ha ki pulit.
U Vivek da ong u leh wa da pyntip cha ki bor chnong, wei da phah leh ya ki pulit wow thooh ya kini ki bru.
Hawa kylli lada em iwon iwon i suba, u Vivek da ong u wa ympu ye u ong iwon iwon hajrong ini wei da yoo khaddooh ya ki ha Nongriat wei neitæ hi u sdang u thooh ya ki.
Da pyntip leh wa kini ki bru da pynemkaam ki ya uwi u Guide uwa da li yah ki cha ka Shipara Homestay heiwa da sahmiet nyngkong ki.
Yei chim wai ki ya kani ka Scooty leh da ye wow pyntikna na u tre wa e wai.
Discussion about this post