Neiliang ka Health & Family Welfare Department ka sorkar Meghalaya ynne da khut yalang ko ya ka Medical Expert Committee (MEC) yow pait yei pynkhreh pyrchah ya u COVID-19 hadien wa da sdang biang kiwa em wa yoh ya uni u khñiang hapoh ka ri.
Ya ka yalang da pynlai da u Sampath Kumar, Principal Secretary & Development Commissioner ka chnat wei da emlang ki bru wa chemphang heiyatoh wa i chait i khiah na ki thaw sumaar ka sorkar deilang ki yong ki bru samen.
Neiliang ka State Surveillance Officer ka Integrated Disease Survelliance Programmer (IDSP) da khana ko yei rukom em kiwa yoh COVID-19 ha Meghalaya nadooh u 2020 hadooh uni u bnai kamjooh ki bru wa da yoh tika wa iwa da em chwa i pynkhreh wa kattæ yow leh yeiwa emkaam.
Da pyntip wa ha uni u snem ym em wa yoh COVID-19 hapoh Meghalaya tangwa hap wow man kiwa paitbniah deiwa leh yei Test wei wow yada leh heijooh i por.
Da phah leh ya waroh ki thaw sumaar wow pynbiang ki ya ki Oxygen kamjooh ki kor sumaar wei lada jia wa em wa yoh ya ki jiat kjut wa man kam ki Severe Acute Respiratory Infection (SARI), ki Influenza-like-Illness (ILI) wa kiwa iñdoh wow pait bniah ya ki.
Najrong kini da phah leh wow pyntikna wa biang ki dawai wei wa krehkaam ki Testing Centre wa em ha ki District wei kamjooh leh wow kynmoo ya ki kyndon kammon wow leh yow lait u poor uni u khñiang kam nachwa.
Ka ri wa em chajan wa ku kiwa yoh COVID-19 kattæ toh ka ri Thailand kawa da em 52,917 ngut kiwa yoh nadooh ka 18 hadooh ka 24 tarik uni u bnai wei da em 4 ngut kiwa yap. Tangwa deiwa kheiñ nadooh wa sdang u 2025 kiwa yoh da em ki 1,86,000 ngut.
Ha India kiwa yoh COVID-19 hadooh kattæ da em ki 1010 ngut heiwa kiwa boon toh ha Kerala 430 ngut, Maharashtra 210 ngut wa ha Delhi 104 ngut.
Discussion about this post