I kynaad wa i kajia pood hapyrdi ka Assam wa Meghalaya dang pteiñ i hadooh kini ki sngi heiwa ynne ka sngi i kynaad da sdang i hapyrdi ki Pnar wa ki Karbi ha khappood ka chnong Lapangap.
Katkam ka khubor wa da yoh, ya ki tre dieñ da wan thung da ka sorkar Assam ha u loom ka Chnong Lapangap nadooh ka 10 tarik uni u bnai wei i yaklam hapyrdi ki heh ka West Jaiñtia wa West Karbi da sdang i hadien ini.
Neiliang ki waheh na ka chnong Lapangap wa ka Tahpat da toh u yachem yaklam pynbait ki yeini ynne ka sngi tangwa hadien wym em wan ki waheh ka jaitbru Karbi, ki paidbah ka chnong Lapangap kiwa em kamwa 200 ngut da hiar ki ha ini i thaw wa thung ya ki tre dieñ wa tip kam i Loom Umchyrngan heiwa da phut wei da thang yei trep wa chipor wa da chna ka sorkar Assam.
Heipor wa sdang i phut ya kini ki tre dieñ, ki pulit Assam da siat Tear Gas ki cha ki paidbah ka Lapangap.
Hawa yaklam wa u DC ka West Jaiñtia Hills, u Abhinav Kumar Singh da ong u wa i yaklam hapyrdi ki heh District wa ki heh pulit ki ar District da pynman dei langær ha ki por wa dadep wei neiliang ki bor District ka West Jaiñtia hadien wa yoo yeini i kaam wa man iwa synjor da phah ya le ngut ki Magistrate ha ini i thaw.
Da pyntip u leh wa ki pulit na ka District da em ki kamwa 200 ngut hapoh i pait u Addl. SP, DSP, wa kiwi.
Heijooh i por da ong u wa ki bor pulit daw neh ki ha ini i thaw ha ki sngi wow wan khnang wow pyntikna wa em i chongsuk.
Discussion about this post